മഹേഷ് ബാബു, കീര്‍ത്തി സുരേഷ് എന്നിവര്‍ കേന്ദ്രകഥാപാത്രങ്ങളായെത്തിയ സര്‍ക്കാരു വാരി പാട്ടയിലെ കലാവതി എന്ന പാട്ടിന്റെ വീഡിയോ പുറത്ത്. മനോഹരമായ ദൃശ്യങ്ങളോടെയുള്ള പാട്ടിന്റെ ലിറിക്കല്‍ വീഡിയോ പുറത്ത് വന്നപ്പോള്‍ തന്നെ തെന്നിന്ത്യയാകെ ഹിറ്റടിച്ചിരുന്നു.
ഇന്ന് പുറത്ത് വന്ന വീഡിയോയും ആരാധകര്‍ ഏറ്റെടുത്തിരിക്കുകയാണ്. മഹേഷ് ബാബുവിന്റെ ബിസിനസുകാരനായ കഥാപാത്രത്തിന്റെ കാശ് സൂത്രത്തില്‍ തട്ടിയെടുക്കുന്ന കീര്‍ത്തിയേയാണ് വീഡിയോയില്‍ കാണുന്നത്.
സിദ്ദ് ശ്രീറാം പാടിയ പാട്ടിന് സംഗീതം നല്‍കിയിരിക്കുന്നത് എസ്. തമന്‍ ആണ്. മൈത്രി മൂവി മേക്കേഴ്‌സും മഹേഷ് ബാബു എന്റര്‍ടെയ്ന്‍മെന്റ്‌സും ചേര്‍ന്നാണ് സര്‍ക്കാരു വാരി പാട്ട നിര്‍മിച്ചത്. ഒരു ആക്ഷന്‍ റൊമാന്റിക് ചിത്രമായിട്ടായിരുന്നു സര്‍ക്കാരു വാരി പാട്ട എത്തിയത്. സമുദ്രക്കനി, വന്നേല കിഷോര്‍, സൗമ്യ മേനോന്‍ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചത്.
മെയ് 12നാണ് ചിത്രം തിയേറ്ററുകളിലെത്തിയത്. ആര്‍. മധിയാണ് ചിത്രത്തിന്റെ ഛായാഗ്രാഹണം നിര്‍വഹിക്കുന്നത്. സംവിധായകന്‍ പരശുറാമിന്റേതു തന്നെയാണ് ചിത്രത്തിന്റെ തിരക്കഥയും.
രാജമൗലി സംവിധാനം ചെയ്യുന്ന പുതിയ ചിത്രത്തില്‍ നായകനാകുക മഹേഷ് ബാബുവാണ്. ഒരു ആക്ഷന്‍ ത്രില്ലര്‍ ഡ്രാമയായിരിക്കും ഇതെന്നാണ് റിപ്പോര്‍ട്ടുകള്‍. അടുത്ത വര്‍ഷം പകുതിയോടെ ചിത്രം ഷൂട്ടിങ് ആരംഭിക്കും.
ടൊവിനോ തോമസ് നായകനാവുന്ന വാശിയാണ് ഇനി കീര്‍ത്തിയുടേതായി ഉടന്‍ പുറത്തിറങ്ങുന്നത്. ജൂണ്‍ 17നാണ് ചിത്രത്തിന്റെ റിലീസ്.
Content Highlight: Sarkar vari Patta Kalavathi video song starring Mahesh Babu and Keerthi Suresh