കര്‍ണാടക: പ്രതിപക്ഷ പാര്‍ട്ടികളുടെ രണ്ടാം ഘട്ട യോഗത്തിലെ ആദ്യ ദിനത്തില്‍ എന്‍.സി.പി അധ്യക്ഷന്‍ ശരദ് പവാര്‍ പങ്കെടുക്കില്ല. ഇന്നും നാളെയുമായി ബെംഗളൂരുവിലാണ് രണ്ടാം ഘട്ട പ്രതിപക്ഷ യോഗം നടക്കുന്നത്. നാളെ നടക്കുന്ന യോഗത്തിലാണ് അദ്ദേഹം പങ്കെടുക്കുകയെന്ന് എന്‍.സി.പി വക്താവ് മഹേഷ് ഭാരേത് തപാസെ ട്വീറ്റ് ചെയ്തു.
‘എന്‍.സി.പി ദേശീയ അധ്യക്ഷന്‍ ശരദ് പവാര്‍ സാഹേബും എക്‌സിക്യൂട്ടീവ് പ്രസിഡന്റ് സുപ്രിയ സുലേയും ജൂലൈ 18 ചൊവ്വാഴ്ച നടക്കുന്ന യോഗത്തില്‍ പങ്കെടുക്കും,’ അദ്ദേഹം പറഞ്ഞു.
NCP National President Shri Sharad Pawar Saheb & working President Smt @supriya_sule will attend the meeting called by opposition parties on Tuesday 18th July in Bengaluru.@PTI_News @ANI
— Mahesh Bharet Tapase महेश भारत तपासे (@maheshtapase) July 17, 2023
ശിവസേന (യു.ബി.ടി) നേതാവ് സഞ്ജയ് റാവോത്തും പവാര്‍ നാളെ പങ്കെടുക്കുമെന്ന് ട്വീറ്റ് ചെയ്തിട്ടുണ്ട്.
‘പട്‌ന യോഗത്തിന് ശേഷം ബെംഗളൂരുവില്‍ നടക്കുന്ന യോഗം വളരെ നിര്‍ണായകമാണ്. ശിവസേന പാര്‍ട്ടി നേതാവ് ഉദ്ദവ് താക്കറെ യോഗത്തില്‍ പങ്കെടുക്കും. ശരദ് പവാര്‍ യോഗത്തില്‍ പങ്കെടുക്കുമോ ഇല്ലയോ എന്നുള്ള സംശയങ്ങള്‍ നിലനില്‍ക്കുന്നുണ്ട്. യോഗത്തില്‍ പങ്കെടുക്കാന്‍ നാളെ തന്നെ പവാര്‍ ബെംഗളൂരുവിലെത്തും. അത്ര ഉറപ്പോട് കൂടിയാണ് ഞാനിത് പറയുന്നത്,’ അദ്ദേഹം പറഞ്ഞു.
