നെയ്വേലി: സന്തോഷ് ട്രോഫി ഫുട്‌ബോളില്‍ നിലവിലെ ജേതാക്കളായ കേരളം ഫൈനല്‍ റൗണ്ട് കാണാതെ പുറത്ത്. നിര്‍ണായകമായ അവസാന ഗ്രൂപ്പ് മത്സരത്തില്‍ സര്‍വീസസിനോട് തോറ്റതോടെയാണ് കേരളം പുറത്തായത്. എതിരില്ലാത്ത ഒരു ഗോളിനാണ് കേരളത്തിന്റെ തോല്‍വി.
ഗോള്‍രഹിതമായ ആദ്യ പകുതിക്ക് ശേഷം 63-ാം മിനിറ്റിലാണ് സര്‍വീസസിന്റെ വിജയഗോള്‍ വന്നത്. വികാസ് ഥാപ്പയാണ് ഗോള്‍ സ്‌കോറര്‍. അഞ്ച് മിനിറ്റിനുള്ളില്‍ കേരളത്തിന് വീണ്ടും തിരിച്ചടി നേരിട്ടു. പ്രതിരോധ താരം അലക്സ് സാജി ചുവപ്പ് കാര്‍ഡ് കണ്ട് പുറത്തായി. ഇതോടെ കേരളം പത്ത് പേരിലേക്ക് ചുരുങ്ങി.
വിജയത്തോടെ തെലങ്കാനയെ മറികടന്ന് സര്‍വീസസ് ഫൈനല്‍ റൗണ്ട് യോഗ്യത നേടി. സര്‍വീസസിനെ എതിരില്ലാത്ത രണ്ട് ഗോളിന് തോല്‍പ്പിച്ചാല്‍ കേരളത്തിന് ഫൈനല്‍ റൗണ്ടിലേക്ക് മുന്നേറാമായിരുന്നു. എന്നാല്‍ മത്സരത്തിന്റെ രണ്ടാം പകുതിയില്‍ നേടിയ ഒരേയൊരു ഗോളില്‍ സര്‍വീസസ് വിജയം പിടിച്ചെടുക്കുകയായിരുന്നു
കേരളം നാട്ടിലേക്ക് മടങ്ങുന്നത് ടൂര്‍ണമെന്റില്‍ ഒരൊറ്റ ഗോള്‍ പോലും എതിര്‍ വലയിലെത്തിക്കാനാകാതെയാണ്. തെലങ്കാനയ്ക്കെതിരേയും പുതുച്ചേരിക്കെതിരേയും കേരളം ഗോള്‍രഹിത സമനിലയില്‍ പിരിഞ്ഞിരുന്നു.