കൊച്ചി: “സൂപ്പര്‍ സ്റ്റാര്‍ സന്തോഷ് പണ്ഡിറ്റും ഗ്ലാമറസ് മിനി റിച്ചാര്‍ഡും ഒന്നിക്കുന്നു”. കഴിഞ്ഞ രണ്ട് ദിവസമായി നവമാധ്യമങ്ങളില്‍ സജീവ ചര്‍ച്ചയാണ് ഈ വാര്‍ത്ത. ഒരു സിനിമാ വാരിക നല്‍കിയ ഈ വാര്‍ത്ത പ്രമുഖ മാധ്യമങ്ങളടക്കം റിപ്പോര്‍ട്ട് ചെയ്തു. ഈ വാര്‍ത്തകളോട് സന്തോഷ് പണ്ഡിറ്റ് പ്രതികരിക്കുകയാണ്.
“തെറ്റായ വാര്‍ത്തകളാണ് പ്രചരിക്കുന്നത്. എവിടെ നിന്നാണ് ഇത്തരം വാര്‍ത്തകള്‍ വരുന്നതെന്ന് എനിക്കറിയില്ല. ആരാണ് മിനി റിച്ചാര്‍ഡ്. ആ കുട്ടിയെ ഞാന്‍ അറിയുക പോലുമില്ല” എന്നായിരുന്നു സന്തോഷ് പണ്ഡിറ്റിന്റെ പ്രതികരണം.
ഉരുക്കു സതീശന് മാത്രമാണ് താന്‍ സംവിധാനം ചെയ്യുന്ന ചിത്രമെന്നും താനിപ്പോള്‍ ഉരുക്കു സതീശന്റെ സെറ്റിലാണെന്നും സന്തോഷ് പണ്ഡിറ്റ് ഐ.ഇ മലയാളത്തോട് പറഞ്ഞു.
താന്‍ തിരക്കഥയും സംഭാഷണവും രചിച്ച് സംവിധാനം ചെയ്ത് അഭിനയിക്കുന്ന ഉരുക്കു സതീശന് പുറമെ അജയ് വാസുദേവ് സംവിധാനം ചെയ്യുന്ന മമ്മൂട്ടി സിനിമയിലും താന്‍ അഭിനയിക്കുന്നുണ്ടെന്നും പണ്ഡിറ്റ് അറിയിച്ചു.
മമ്മൂട്ടിയോടൊപ്പം മുഴുനീള റോളിലാണ് പുലിമുരുകന്‍ തിരക്കഥാകൃത്ത് ഉദയ്കൃഷ്ണ രചിക്കുന്ന സിനിമയില്‍ പണ്ഡിറ്റ് എത്തുന്നത്. മമ്മൂട്ടി ചിത്രത്തിനിടയില്‍ ലഭിച്ച അഞ്ച് ദിവസത്തെ ഇടവേളയിലാണ് ഉരുക്കു സതീശന്റെ ജോലികള്‍ പുനരാരംഭിച്ചതെന്നും അദ്ദേഹം പറഞ്ഞു.