ഇന്ത്യയുടെ സിംബാബ്‌വേ പര്യടനത്തിലെ നാലാം ടി-20ക്ക് കളമൊരുങ്ങുകയാണ്. ആദ്യ മത്സരം പരാജയപ്പെട്ടെങ്കിലും അടുത്ത രണ്ട് മത്സരത്തിലും ജയിച്ചുകയറിയ ഇന്ത്യക്ക് നാലാം ടി-20 വിജയിച്ചാല്‍ പരമ്പര സ്വന്തമാക്കാം. എന്നാല്‍ പരമ്പര നഷ്ടപ്പെടാതിരിക്കാന്‍ സിംബാബ്‌വേക്ക് വിജയം അനിവാര്യമാണ്. ഈ സാഹചര്യത്തില്‍ നാലാം ടി-20യില്‍ തീ പാറുമെന്നുറപ്പാണ്.
ഈ മത്സരത്തില്‍ ഇന്ത്യന്‍ വൈസ് ക്യാപ്റ്റന്‍ സഞ്ജു സാംസണെ ഒരു തകര്‍പ്പന്‍ നേട്ടവും കാത്തിരിക്കുന്നുണ്ട്. ടി-20 ഫോര്‍മാറ്റില്‍ 300 സിക്‌സറുകളെന്ന നേട്ടമാണ് താരത്തിന് മുമ്പിലുള്ളത്. ഇതിന് വേണ്ടതാകട്ടെ വെറും രണ്ട് സിക്‌സറും.
ഇന്ത്യന്‍ ടീമിന് പുറമെ ആഭ്യന്തര തലത്തില്‍ കേരളത്തിനും ഐ.പി.എല്ലില്‍ രാജസ്ഥാന്‍ റോയല്‍സ്, ദല്‍ഹി ക്യാപ്പിറ്റല്‍സ് (ദല്‍ഹി ഡെയര്‍ഡെവിള്‍സ്) എന്നീ ടീമുകള്‍ക്കും വേണ്ടിയാണ് സഞ്ജു ടി-20യില്‍ ബാറ്റേന്തിയിട്ടുള്ളത്.
കളിച്ച 274 മത്സരത്തിലെ 262 ഇന്നിങ്‌സില്‍ നിന്നുമായി 6,733 റണ്‍സാണ് സഞ്ജു സ്വന്തമാക്കിയത്. മൂന്ന് സെഞ്ച്വറിയും 45 അര്‍ധ സെഞ്ച്വറിയുമടങ്ങുന്നതാണ് ഇതുവരെയുള്ള താരത്തിന്റെ ടി-20 കരിയര്‍. 298 സിക്‌സറിനൊപ്പം 551 ബൗണ്ടറികളും താരം നേടിയിട്ടുണ്ട്.
ടി-20 ലോകകപ്പില്‍ ഇന്ത്യയുടെ സ്‌ക്വാഡില്‍ ഇടം നേടിയിരുന്നെങ്കിലും ഒരിക്കല്‍ പോലും പ്ലെയിങ് ഇലവന്റെ ഭാഗമാകാന്‍ സഞ്ജുവിന് സാധിച്ചിരുന്നില്ല. സബ്സ്റ്റിറ്റിയൂട്ട് ഫീല്‍ഡറായി താരം കളത്തിലിറങ്ങിയിരുന്നു.
ലോകകപ്പ് ആഘോഷങ്ങളുടെ ഭാഗമായി ഇന്ത്യ – സിംബാബ്‌വേ പര്യടനത്തിലെ ആദ്യ രണ്ട് മത്സരങ്ങളും താരത്തിന് നഷ്ടമായിരുന്നു. മൂന്നാം മത്സരത്തിലാണ് രാജസ്ഥാന്‍ നായകന്‍ ടീമിനൊപ്പം ചേര്‍ന്നത്. പിന്നാലെ ഇന്ത്യയുടെ വൈസ് ക്യാപ്റ്റനായും സഞ്ജുവിനെ നിയമിച്ചിരുന്നു.
കളത്തിലിറങ്ങിയ മൂന്നാം മത്സരത്തില്‍ ഏഴ് പന്ത് നേരിട്ട് പുറത്താകാതെ 12 റണ്‍സാണ് താരം നേടിയത്. നാച്ചുറല്‍ പൊസിഷനായ വണ്‍ ഡൗണിന് പകരം അഞ്ചാം നമ്പറിലാണ് സഞ്ജു ക്രീസിലെത്തിയത്. രണ്ട് ബൗണ്ടറിയും താരത്തിന്റെ ഇന്നിങ്‌സിലുണ്ടായിരുന്നു.
അടുത്ത മത്സരത്തില്‍ രണ്ട് സിക്‌സറുകള്‍ നേടാന്‍ സാധിച്ചാല്‍ 300 സിക്‌സര്‍ എന്ന കരിയര്‍ മൈല്‍സ്റ്റോണ്‍ മറികടക്കാനും സഞ്ജുവിന് സാധിക്കും. ഇതിന് മുമ്പ് ആറ് ഇന്ത്യന്‍ താരങ്ങള്‍ മാത്രമാണ് ടി-20യില്‍ 300 സിക്‌സര്‍ മാര്‍ക് പിന്നിട്ടത്.
രോഹിത് ശര്‍മ (525), വിരാട് കോഹ്‌ലി (416), എം.എസ്. ധോണി (338), സുരേഷ് റെയ്‌ന (325), സൂര്യകുമാര്‍ യാദവ് (322), കെ.എല്‍. രാഹുല്‍ (311) എന്നിവരാണ് ഇതിന് മുമ്പ് ഈ നേട്ടത്തിലെത്തിയ ഇന്ത്യന്‍ താരങ്ങള്‍.
ശനിയാഴ്ചയാണ് പരമ്പരയിലെ നാലാം ടി-20. ഹരാരെയാണ് വേദി. ഇന്ത്യന്‍ സമയം വൈകീട്ട് 4.30നാണ് മത്സരം.
