ബി.ജെ.പിയിലേക്ക് ഇറക്കുമതി ചെയ്തവരുടെ വെറും മോഹമാണിത്; ശിവസേന മന്ദിരം തകര്‍ക്കുമെന്ന ബി.ജെ.പി നേതാവിന്റെ പ്രസ്താവനയില്‍ സഞ്ജയ് റാവത്ത്
ഡൂള്‍ന്യൂസ് ഡെസ്‌ക്
Monday, 2nd August 2021, 11:44 am
മുംബൈ: മഹാരാഷ്ട്രയിലെ ശിവസേന ആസ്ഥാന മന്ദിരം ഇടിച്ചുതകര്‍ക്കുമെന്ന ബി.ജെ.പി എം.എല്‍.എ പ്രസാദ് ലാഡിന്റെ പ്രസ്താവനയില്‍ പ്രതികരിച്ച് ശിവസേന നേതാവ് സഞ്ജയ് റാവത്ത്. ബി.ജെ.പിയിലേക്ക് ഇറക്കുമതി ചെയ്ത ചിലരുടെ മോഹമാണിതെന്നാണ് റാവത്ത് പറഞ്ഞത്.
‘ശിവസേന മന്ദിരം തകര്‍ക്കാന്‍ ഒരു യഥാര്‍ത്ഥ ബി.ജെ.പിക്കാരന് കഴിയില്ല. ഈ പറയുന്നവര്‍ ബി.ജെ.പിക്കാരല്ല. ആ പാര്‍ട്ടിയിലേക്ക് ഇറക്കുമതി ചെയ്ത ചിലരാണ് ഇത്തരം പ്രസ്താവന നടത്തുന്നത്.
മഹാരാഷ്ട്രയില്‍ ബി.ജെ.പിയെ തകര്‍ക്കാന്‍ ഇത്തരക്കാര്‍ തന്നെ ധാരാളം. മാപ്പ് പറഞ്ഞതുകൊണ്ട് തീരുന്നതല്ല ഇത്,’ സഞ്ജയ് റാവത്ത് പറഞ്ഞു.
പ്രസാദ് ലാഡിന് മറുപടിയുമായി മഹാരാഷ്ട്ര മുഖ്യമന്ത്രി ഉദ്ദവ് താക്കറെയും രംഗത്തെത്തിയിരുന്നു. ഭീഷണിയുടെ സ്വരം ശിവസേനയുടെ അടുത്ത് വിലപ്പോകില്ലെന്നായിരുന്നു ഉദ്ദവ് പറഞ്ഞത്.
