നിക്കലോഡിയന്‍ സ്റ്റുഡിയോയുടെ ഡോറ ദി എക്സ്പ്ലോററിന്റെ പുതിയ ലൈവ്-ആക്ഷന്‍ ചിത്രം വരുന്നുവെന്ന വാര്‍ത്ത മുമ്പ് തന്നെ ചര്‍ച്ചയായിരുന്നു. ചിത്രത്തിന് ‘ഡോറ, സെര്‍ച്ച് ഫോര്‍ സോള്‍ ഡൊറാഡോ’ എന്നായിരുന്നു താത്കാലികമായി നല്‍കിയിരുന്ന പേര്.
ഡോറയും സുഹൃത്തുക്കളും സോള്‍ ഡൊറാഡോയുടെ നിധി ശത്രുക്കളുടെ കൈകളില്‍ നിന്ന് സംരക്ഷിക്കാനായി ആമസോണ്‍ കാടിലൂടെ സഞ്ചരിക്കുന്നതും അവര്‍ക്ക് അവിടുന്ന് നേരിടേണ്ടി വരുന്ന അപകടങ്ങളും മറ്റുമാണ് ‘ഡോറ, സെര്‍ച്ച് ഫോര്‍ സോള്‍ ഡൊറാഡോ’ പറയുന്നത്.
പാരാമൗണ്ട് പ്ലസും നിക്കലോഡിയണും ചേര്‍ന്ന് നിര്‍മിക്കുന്ന ചിത്രം സംവിധാനം ചെയ്യുന്നത് ആല്‍ബെര്‍ട്ടോ ബെല്ലിയാണ്. ഡിസ്‌നി പ്ലസ് ഹോളിഡേക്ക് വേണ്ടി ‘ദി നോട്ടി നൈന്‍’ പോലെയുള്ള സിനിമകള്‍ സംവിധാനം ചെയ്ത സംവിധായകനാണ് അദ്ദേഹം.
ഇപ്പോള്‍ സിനിമയില്‍ ടൈറ്റില്‍ റോളിലേക്ക് എത്തുന്ന നായിക ആരാണെന്ന കാര്യം അണിയറപ്രവര്‍ത്തകര്‍ പുറത്തുവിട്ടിരിക്കുകയാണ്. സമാന്ത ലോറെയ്‌നാണ് ചിത്രത്തില്‍ ഡോറയായി എത്തുന്നത്. 2020ല്‍ പുറത്തിറങ്ങിയ ‘കിഡ് സ്റ്റ്യൂ’ എന്ന സീരീസിലൂടെ തന്റെ കരിയര്‍ ആരംഭിച്ച താരമാണ് സമാന്ത.
അതേസമയം, 2000ല്‍ പുറത്തിറങ്ങി ലോങ് റണ്ണിങ്ങ് ആനിമേറ്റഡ് ചില്‍ഡ്രന്‍സ് ഷോയായി മാറിയ ഡോറ ഇത് രണ്ടാം തവണയാണ് ലൈവ്-ആക്ഷന്‍ ചിത്രമാകുന്നത്. 2019ല്‍ തിയേറ്ററിലെത്തിയ ‘ഡോറ ആന്‍ഡ് ദി ലോസ്റ്റ് സിറ്റി ഓഫ് ഗോള്‍ഡ്’ ആയിരുന്നു ഡോറയുടെ ആദ്യ ലൈവ്-ആക്ഷന്‍ ചിത്രം.
ഇസബെല മോണറായിരുന്നു ചിത്രത്തില്‍ ഡോറയായി എത്തിയത്. ജെയിംസ് ബോബിന്‍ സംവിധാനം ചെയ്ത ‘ഡോറ ആന്‍ഡ് ദി ലോസ്റ്റ് സിറ്റി ഓഫ് ഗോള്‍ഡ്’ 49 മില്യണ്‍ ഡോളറിന്റെ ബജറ്റില്‍ ഒരുങ്ങി ലോകമെമ്പാടും നിന്നായി 120 മില്യണ്‍ ഡോളറായിരുന്നു നേടിയത്.
Content Highlight: Samantha Lorraine Cast As Dora In Dora Explorer Live Action Movie