മോസ്‌കോ: അവസാന മിനുട്ടിലെ ഗോളില്‍ ഈജിപ്തിനെതിരെ സൗദിയ്ക്ക് 2-1ന്റെ ജയം. 95ാം മിനുട്ടില്‍ അല്‍ ദൗസരിയാണ് സൗദിയുടെ വിജയഗോള്‍ നേടിയത്. വാശിയേറിയ മത്സരത്തില്‍ സൗദിക്കായിരുന്നു ആധിപത്യം.
മത്സരത്തില്‍ 22ാം മിനുട്ടില്‍ സലാഹാണ് ഈജ്പ്തിനായി ആദ്യ ഗോള്‍ നേടിയത്. ടൂര്‍ണമെന്റിലെ സലാഹിന്റെ രണ്ടാമത്തെ ഗോളായിരുന്നു ഇത്. ആദ്യ പകുതിയുടെ എക്സ്ട്രാ ടൈമില്‍ പെനാല്‍റ്റിയിലൂടെയാണ് സൗദി ഇതിന് തിരിച്ചടി നല്‍കിയത്. ഫഹദ് അല്‍ മുല്‍വലാദിനെ ഫൗള്‍ ചെയ്തതിനാണ് പെനാല്‍റ്റി ലഭിച്ചത്. കിക്കെടുത്ത അല്‍ ഫറജ് ഇത് ഗോളാക്കുകയായിരുന്നു.
നേരത്തെ 40ാം മിനുട്ടില്‍ ഫഹദ് അല്‍ മുല്‍വലാദ് എടുത്ത പെനാല്‍റ്റി ഈജിപ്ത് ഗോളി എസ്സാം അല്‍ഹദാരി തടഞ്ഞു. ഹാന്‍ഡ്ബോളിനാണ് പെനാല്‍റ്റി വിധിച്ചത്.
ലോകകപ്പില്‍ നിന്ന നേരത്തെ തന്നെ പുറത്തായ ഈജിപ്തിനും സൗദിക്കും ഇന്നത്തെ മത്സരം അഭിമാനപോരാട്ടമായിരുന്നു. ജയത്തോടെ ഗ്രൂപ്പ് എയില്‍ മൂന്നാമതായാണ് സൗദി നാട്ടിലേക്ക് മടങ്ങുന്നത്. ഈജിപ്താകട്ടെ കളിച്ച കളിയെല്ലാം തോറ്റിട്ടും.