ആര്‍.എസ്.എസിന് തിരിച്ചടി; ഗാന്ധിവധത്തെക്കുറിച്ചുള്ള പരാമര്‍ശത്തില്‍ രാഹുലിനെതിരെ പ്രസംഗത്തിന്റെ പകര്‍പ്പ് തെളിവായി സ്വീകരിക്കില്ലെന്ന് ഹൈക്കോടതി
ഡൂള്‍ന്യൂസ് ഡെസ്‌ക്
Monday, 20th September 2021, 6:03 pm
മുംബൈ: മഹാത്മാ ഗാന്ധിയുടെ കൊലപാതകത്തില്‍ ആര്‍.എസ്.എസിന് പങ്കുണ്ടെന്ന കോണ്‍ഗ്രസ് നേതാവ് രാഹുല്‍ ഗാന്ധിയുടെ പ്രസംഗത്തിന്റെ പകര്‍പ്പ് അപകീര്‍ത്തിക്കേസില്‍ തെളിവായി സ്വീകരിക്കാനാവില്ലെന്ന് ബോംബെ ഹൈക്കോടതി.
രാഹുലിന്റെ പ്രസംഗത്തിന്റെ പകര്‍പ്പ് തെളിവായി ഫയലില്‍ സ്വീകരിക്കണമെന്നാവശ്യപ്പെട്ടുകൊണ്ടുള്ള ആര്‍.എസ്.എസ് നേതാവ് രാജേഷ് കുന്ദെയുടെ ഹരജി തള്ളിക്കൊണ്ടായിരുന്നു കോടതിയുടെ പ്രതികരണം.
നേരത്തെ ഇയാള്‍ 2018 ല്‍ ഇതേ കാര്യമാവശ്യപ്പെട്ട് മജിസ്‌ട്രേറ്റ് കോടതിയെ സമീപിച്ചിരുന്നു. എന്നാല്‍ മജിസ്‌ട്രേറ്റ് കോടതി ഹരജി തള്ളുകയായിരുന്നു.
2014 ലാണ് രാഹുല്‍, ഗാന്ധി വധത്തില്‍ ആര്‍.എസ്.എസിന് പങ്കുണ്ടെന്ന് പ്രസംഗിച്ചത്. മഹാരാഷ്ട്രയിലെ താനെയിലെ തെരഞ്ഞെടുപ്പ് പൊതുയോഗത്തിനിടെയായിരുന്നു രാഹുലിന്റെ പരാമര്‍ശം.
