കാസര്‍ഗോഡ്: കാസര്‍ഗോഡ് ജില്ലയിലെ മഞ്ചേശ്വരത്ത്, ആര്‍.എസ്.എസ് നിയന്ത്രണത്തിലുള്ള ബായാര്‍ വീര കേസരി ക്ലബ്ബിന്റെ ആഭിമുഖ്യത്തില്‍ ഹിന്ദുമതവിഭാഗത്തിന് മാത്രമായി കായിക മത്സരം സംഘടിപ്പിച്ചത് നാടിന്റെ മത നിരപേക്ഷ – ജനാധിപത്യ മൂല്യങ്ങളോടുള്ള പരസ്യമായ വെല്ലുവിളിയാണെന്ന് ഡി.വൈ.എഫ്.ഐ.
കേരളത്തിന്റെ വടക്കേ അറ്റത്ത് കര്‍ണാടക മോഡലില്‍ സമൂഹത്തെ സാമുദായിക- വര്‍ഗീയ വിഭജനത്തിന്റെ പരീക്ഷണ ശാലയാക്കാന്‍ സംഘപരിവാര്‍ കാലങ്ങളായി നടത്താന്‍ ശ്രമിക്കുന്ന പരീക്ഷണങ്ങളുടെ ഭാഗമാണ് ഹിന്ദുക്കള്‍ക്ക് മാത്രമായുള്ള ഈ കായിക മത്സരമെന്നും ഡി.വൈ.എഫ്.ഐ കുറ്റപ്പെടുത്തി. ഡി.വൈ.എഫ്.ഐ സംസ്ഥാന കമ്മറ്റിയാണ് ഇതുസംബന്ധിച്ച് പ്രസ്താവനയിറക്കിയത്.
‘കേരളത്തില്‍ കേട്ട് കേള്‍വിയില്ലാത്ത സംഭവമാണ് ഒരു പൊതു ക്ലബ്ബ് ഏതേലും മത വിഭാഗങ്ങള്‍ക്ക് മാത്രമായി കായിക പരിപാടി സംഘടിപ്പിക്കുക എന്നത്.
കേരളത്തെ പോലെ ഉയര്‍ന്ന മത നിരപേക്ഷ മൂല്യങ്ങള്‍ കാത്തു സൂക്ഷിക്കുന്ന മണ്ണില്‍ ഈ വര്‍ഗീയ കോപ്പുകൂട്ടല്‍ ഡി.വൈ.എഫ്.ഐ അനുവദിച്ചുകൊടുക്കില്ല. ഇത്തരം പ്രവണതകളെ ഡി.വൈ.എഫ്.ഐ ശക്തമായി നേരിടും.
