ഐ.പി.എല്ലില്‍ 11 വര്‍ഷത്തിനു ശേഷം രോഹിത് ശര്‍മ കളത്തിനു പുറത്ത്; ലോകകപ്പിനെ ബാധിക്കുമോയെന്ന് ആശങ്ക
സ്പോര്‍ട്സ് ഡെസ്‌ക്
Wednesday, 10th April 2019, 11:24 pm
മുംബൈ: ഐ.പി.എല്ലില്‍ 11 വര്‍ഷത്തിനിടെ ആദ്യമായി കരയ്ക്കിരുന്നു കളികണ്ട് മുംബൈ ഇന്ത്യന്‍സ് ബാറ്റ്‌സ്മാന്‍ രോഹിത് ശര്‍മ. ബുധനാഴ്ച കിങ്‌സ് ഇലവന്‍ പഞ്ചാബിനെതിരേ നടന്ന മത്സരത്തിലായിരുന്നു രോഹിതിനു കരയ്ക്കിരിക്കേണ്ടിവന്നത്. പരിശീലനത്തിനിടെ പരിക്കേറ്റതാണു കാരണം.
കഴിഞ്ഞദിവസം നടന്ന പരിശീലനത്തിനിടെ രോഹിതിനു വലതുകാലില്‍ പേശിവലിവ് അനുഭവപ്പെട്ടെന്നും മുന്‍കരുതലെന്ന നിലയ്ക്ക് ഒരു മത്സരത്തില്‍ വിശ്രമം അനുവദിച്ചിരിക്കുകയാണെന്നുമാണ് മുംബൈ ടീം മാനേജ്‌മെന്റിന്റെ വിശദീകരണം.
കാലിനു വേദന അനുഭവപ്പെട്ട രോഹിത് മൈതാനത്തു കിടക്കുകയായിരുന്നു. ഉടന്‍തന്നെ ഫിസിയോ നിതിന്‍ പട്ടേല്‍ എത്തി രോഹിതിനെ പരിശോധിച്ചു. തുടര്‍ന്നു തനിച്ചാണു രോഹിത് ഡ്രസ്സിങ് റൂമിലേക്കു മടങ്ങിയത്.
