വിരാടിനല്ല, അവനാണ് സച്ചിന്‍ ടെന്‍ഡുല്‍ക്കറിനെ മറികടക്കാന്‍ സാധിക്കുക; വമ്പന്‍ പ്രസ്താവനയുമായി റിക്കി പോണ്ടിങ്

ഇംഗ്ലണ്ട് സൂപ്പര്‍ താരം ജോ റൂട്ടിന് സച്ചിന്‍ ടെന്‍ഡുല്‍ക്കറിന്റെ റെക്കോഡ് മറികടക്കാന്‍ സാധിക്കുമെന്ന് മുന്‍ ഓസ്‌ട്രേലിയന്‍ സൂപ്പര്‍ താരവും ഇതിഹാസ ക്യാപ്റ്റനുമായ റിക്കി പോണ്ടിങ്.

ടെസ്റ്റില്‍ ഏറ്റവുമധികം റണ്‍സെന്ന സച്ചിന്റെ റെക്കോഡ് മൂന്നോ നാലോ വര്‍ഷത്തിനികം റൂട്ടിന് തകര്‍ക്കാന്‍ സാധിക്കുമെന്നാണ് പോണ്ടിങ് പറയുന്നത്.

‘ജോ റൂട്ടിന് സച്ചിനെ മറികടക്കാന്‍ സാധിക്കും. അവനിപ്പോള്‍ 33 വയസ് മാത്രമാണുള്ളത്. സച്ചിനേക്കാള്‍ 3,000 റണ്‍സ് മാത്രമാണ് അവന്‍ പിന്നിലുള്ളത്. എന്നാല്‍ ഇത് അവര്‍ എത്ര ടെസ്റ്റ് മത്സരങ്ങള്‍ കളിക്കും എന്നതിനെ ആശ്രയിച്ചിരിക്കും.

വര്‍ഷത്തില്‍ അവര്‍ 10-14 ടെസ്റ്റുകള്‍ വരെ കളിക്കുകയും റൂട്ട് 800-100 റണ്‍സ് നേടുകയും ചെയ്താല്‍ മൂന്നോ നാലോ വര്‍ഷത്തില്‍ അവന്‍ സച്ചിനൊപ്പമെത്തും,’ ഐ.സി.സി റിവ്യൂവില്‍ പോണ്ടിങ് പറഞ്ഞു.

2012ല്‍ ടെസ്റ്റ് കരിയര്‍ ആരംഭിച്ച റൂട്ട് ഇംഗ്ലണ്ടിനായി 143 മത്സരങ്ങളിലാണ് കളത്തിലിറങ്ങിയത്. 50.11 ശരാശരിയില്‍ 12,027 റണ്‍സാണ് റൂട്ട് സ്വന്തമാക്കിയത്. 32 സെഞ്ച്വറിയും 63 അര്‍ധ സെഞ്ച്വറിയുമാണ് ടെസ്റ്റ് ഫോര്‍മാറ്റില്‍ റൂട്ടിന്റെ പേരില്‍ കുറിക്കപ്പെട്ടത്.

ജൂലൈയില്‍ നടന്ന വെസ്റ്റ് ഇന്‍ഡീസിന്റെ ഇംഗ്ലണ്ട് പര്യടനത്തിനിടെ റൂട്ട് ടെസ്റ്റ് ഫോര്‍മാറ്റില്‍ 12,000 റണ്‍സ് എന്ന നാഴികക്കല്ലും പിന്നിട്ടിരുന്നു. ഈ നേട്ടം സ്വന്തമാക്കുന്ന രണ്ടാമത് ഇംഗ്ലണ്ട് താരവും ഏഴാമത് താരവുമാണ് റൂട്ട്.

തന്റെ സമകാലീനരെക്കാള്‍ ഏറെ അകലെയാണ് റൂട്ടിന്റെ സ്ഥാനം. സ്റ്റീവ് സ്മിത്താണ് ടെസ്റ്റില്‍ ഏററവുമധികം റണ്‍സ് നേടിയ ആക്ടീവ് ക്രിക്കറ്റര്‍മാരില്‍ രണ്ടാമന്‍. 56.97 ശരാശരിയില്‍ 9685 റണ്‍സാണ് സ്മിത്തിന്റെ സമ്പാദ്യം.

ടെസ്റ്റില്‍ ഏറ്റവുമധികം റണ്‍സ് നേടിയ താരങ്ങള്‍

(താരം – ടീം – റണ്‍സ് എന്നീ ക്രമത്തില്‍)

സച്ചിന്‍ ടെന്‍ഡുല്‍ക്കര്‍ – ഇന്ത്യ – 15,921

റിക്കി പോണ്ടിങ് – ഓസ്ട്രേലിയ – 13,378

ജാക് കാല്ലിസ് – സൗത്ത് ആഫ്രിക്ക – 13,289

രാഹുല്‍ ദ്രാവിഡ് – ഇന്ത്യ – 13,288

അലിസ്റ്റര്‍ കുക്ക് – ഇംഗ്ലണ്ട് – 12,472

കുമാര്‍ സംഗക്കാര – ശ്രീലങ്ക – 12,400

ജോ റൂട്ട് – ഇംഗ്ലണ്ട് – 12,000*

ബ്രയാന്‍ ലാറ – വെസ്റ്റ് ഇന്‍ഡീസ് – 11,953

ടെസ്റ്റില്‍ 12000 റണ്‍സ് പൂര്‍ത്തിയാക്കിയതോടെ സച്ചിന്റെ മറ്റൊരു റെക്കോഡ് തകര്‍ക്കാനും റൂട്ടിന് സാധിച്ചിരുന്നു. ടെസ്റ്റില്‍ 12,000 റണ്‍സ് എന്ന മാജിക്കല്‍ നമ്പര്‍ പിന്നിടുന്ന പ്രായം കുറഞ്ഞ താരങ്ങളുടെ പട്ടികയിലാണ് റൂട്ട് സച്ചിനെ മൂന്നാം സ്ഥാനത്തേക്ക് തള്ളിയിട്ട് രണ്ടാമതെത്തിയത്.

റൂട്ടിന്റെ മുന്‍ഗാമിയായ അലിസ്റ്റര്‍ കുക്കിന്റെ പേരിലാണ് ഈ റെക്കോഡ്.

12,000 ടെസ്റ്റ് റണ്‍സ് പൂര്‍ത്തിയാക്കുന്ന ഏറ്റവും പ്രായം കുറഞ്ഞ താരം

(താരം – ടീം – 12,000 റണ്‍സ് നേടുമ്പോഴുള്ള പ്രായം എന്നീ ക്രമത്തില്‍)

അലിസ്റ്റര്‍ കുക്ക് – ഇംഗ്ലണ്ട് – 33 വയസും 13 ദിവസവും

ജോ റൂട്ട് – ഇംഗ്ലണ്ട് – 33 വയസും 210 ദിവസവും

സച്ചിന്‍ ടെന്‍ഡുല്‍ക്കര്‍ ഇന്ത്യ – 35 വയസും 176 ദിവസവും

റിക്കി പോണ്ടിങ് – ഓസ്ട്രേലിയ – 35 വയസും 214 ദിവസവും.

Content Highlight: Ricky Ponting Says Joe Root can Surpass Sachin Tendulkar in test runs