വിമണ്‍സ് പ്രീമിയര്‍ ലീഗിലെ ഉദ്ഘാടന മത്സരത്തില്‍ ഗുജറാത്ത് ജെയിന്റ്‌നെസിനെതിരെ റോയല്‍ ചലഞ്ചേഴ്സ് ബെംഗളൂര്‍ തകര്‍പ്പന്‍ വിജയമാണ് സ്വന്തമാക്കിയത്. വഡോദര ക്രിക്കറ്റ് സ്റ്റേഡിയത്തില്‍ നടന്ന മത്സരത്തില്‍ ടോസ് നേടിയ ആര്‍.സി.ബി ഫീല്‍ഡ് തെരഞ്ഞെടുക്കുകയായിരുന്നു.
തുടര്‍ന്ന് നിശ്ചിത ഓവറില്‍ അഞ്ച് വിക്കറ്റ് നഷ്ടത്തില്‍ 201 റണ്‍സിനാണ് ഗുജറാത്തിനെ ആര്‍.സി.ബി തളച്ചത്. മറുപടി ബാറ്റിങ്ങിന് ഇറങ്ങിയ റോയല്‍ ചലഞ്ചേഴ്സ് 18.3 ഓവറില്‍ നാല് വിക്കറ്റ് നഷ്ടത്തില്‍ 202 റണ്‍സ് നേടി വിജയം സ്വന്തമാക്കുകയായിരുന്നു.
മത്സരത്തില്‍ ആര്‍.സി.ബിക്ക് വേണ്ടി മിന്നും പ്രകടനം കാഴ്ചവെച്ചത് റിച്ചാ ഘോഷാണ്. 27 പന്തില്‍ നിന്ന് 64 റണ്‍സ് ആണ് താരം നേടിയത്. നാല് സിക്സും ഏഴ് ഫോറും ഉള്‍പ്പെടെയാണ് പുറത്താകാതെ താരം നേടിയത്. അര്‍ധ സെഞ്ച്വറി നേടിയതോടെ ഒരു തകര്‍പ്പന്‍ റെക്കോഡ് സ്വന്തമാക്കാനും താരത്തിന് സാധിച്ചിരിക്കുകയാണ്. വിമണ്‍സ് പ്രീമിയര്‍ ലീഗില്‍ അതിവേഗം അര്‍ധ സെഞ്ച്വറി നേടുന്ന നാലാമത്തെ താരമാകാനാണ് റിച്ചാ ഘോഷിന് സാധിച്ചത്. ഈ നേട്ടത്തില്‍ മുന്നിലുള്ളത് ഗുജറാത്തിന് വേണ്ടി കളത്തിലിറങ്ങിയ സോഫിയ ഡന്‍ഗ്ലെയ് ആണ്. 18 പന്തിലാണ് താരം അര്‍ധ സെഞ്ച്വറി നേടിയത്.
സോഫിയ ഡന്‍ഗ്ലെയ് (ഗുജറാത്ത് ജെയിന്റ്‌സ്) – 18 – 2023
ഷഫാലി വര്‍മ (ദല്‍ഹി ക്യാപിറ്റല്‍സ്) – 19 – 2023
ഹര്‍മന്‍പ്രീത് കൗര്‍ (മുംബൈ ഇന്ത്യന്‍സ്) – 22 – 2023
റിച്ചാ ഘോഷ് (റോയല്‍ ചലഞ്ചേഴ്സ് ബെംഗളൂരു) – 23 – 2025
താരത്തിന് പുറമേ എല്ലിസ് പെരി 34 പന്തില്‍ നിന്ന് 57 റണ്‍സ് നേടിയിരുന്നു. രണ്ട് സിക്സും ആറ് ഫോറും ആണ് എല്ലിസ് നേടിയത്. ഗുജറാത്ത് ക്യാപ്റ്റന്‍ ആഷ്‌ലി ഗാര്‍ണര്‍ രണ്ട് വിക്കറ്റും ഡീന്‍ട്രാ ഡോട്ടിന്‍, സയാലി എന്നിവര്‍ ഓരോ വിക്കറ്റും നേടി.
ഗുജറാത്തിനു വേണ്ടി ബാറ്റിങ്ങില്‍ മികച്ച പ്രകടനം കാഴ്ചവെച്ചത് ക്യാപ്റ്റന്‍ ആഷ്‌ലി തന്നെയായിരുന്നു. 37 പന്തില്‍ നിന്ന് എട്ട് സിക്സും മൂന്ന് ഫോറും ഉള്‍പ്പെടെ വെടിക്കെട്ട് പ്രകടനമാണ് താരം കാഴ്ചവെച്ചത്. 213. 51 എന്ന കിടിലം സ്ട്രൈക്ക് റേറ്റിലായിരുന്നു താരം ബാറ്റ് വീശിയത്. താരത്തിന് പുറമേ മികച്ച പ്രകടനമാണ് ഓപ്പണര്‍ ബെത് മൂണി നടത്തിയത്. 42 പന്തില്‍ നിന്ന് എട്ട് ഫോര്‍ ഉള്‍പ്പെടെ 56 റണ്‍സ് ആണ് താരം നേടിയത്.
ബെംഗളൂരുവിനു വേണ്ടി രേണുക സിങ് രണ്ടു വിക്കറ്റും കനിക അഹൂജ, ജോര്‍ജിന വെര്‍ഹാം, പ്രേമ റാവത്ത് എന്നിവര്‍ ഓരോ വിക്കറ്റും നേടി. ഡബ്ല്യു.പി.എല്ലില്‍ ഇന്ന് (ശനി) നടക്കുന്ന മത്സരത്തില്‍ മുംബൈ ഇന്ത്യന്‍സും ദല്‍ഹി ക്യാപിറ്റല്‍സുമാണ് ഏറ്റുമുട്ടുന്നത്. വൈകിട്ട് 7: 30നാണ് മത്സരം.
Content Highlight: Richa Ghosh In Great Record Achievement In W.P.L
