ജമ്മുകശ്മീരില്‍ ഇന്റര്‍നെറ്റ് നിയന്ത്രണങ്ങള്‍ ഉടന്‍ നീക്കില്ല; വിലക്കുകള്‍ പുനഃപരിശോധിക്കാന്‍ കേന്ദ്രത്തോട് സുപ്രീം കോടതി
ഡൂള്‍ന്യൂസ് ഡെസ്‌ക്
Friday, 10th January 2020, 11:40 am
ജമ്മുകശ്മീര്‍: ജമ്മുകശ്മീരിന് പ്രത്യേക പദവി നല്‍കുന്ന ആര്‍ട്ടിക്കിള്‍ 370 റദ്ദാക്കിയതിന് പിന്നാലെ ഏര്‍പ്പെടുത്തിയ ഇന്റര്‍നെറ്റ് നിരോധനം ഉള്‍പ്പെടെയുള്ള നിയന്ത്രണങ്ങള്‍ പുനഃപരിശോധിക്കണമെന്ന് സുപ്രീം കോടതി. കശ്മീരില്‍ ഏര്‍പ്പെടുത്തിയ എല്ലാ നിയന്ത്രണങ്ങളും ഒരാഴ്ച്ചയ്ക്കുള്ളില്‍ അധികൃതര്‍ പരിശോധിക്കണമെന്നാണ് നിര്‍ദേശം.
പൗരന്മാരുടെ അവകാശം ഉറപ്പാക്കുക കോടതിയുടെ ലക്ഷ്യമാണ്. പൗരന്മാരുടെ അവകാശത്തോടൊപ്പം തന്നെ അവരുടെ സുരക്ഷയും പ്രധാനമാണെന്ന്് സിപ്രീംകോടതി പറഞ്ഞു.
മൗലീകാവകാശങ്ങള്‍ തടസ്സപെടുത്തികൊണ്ടുള്ള നിയന്ത്രണങ്ങള്‍ ശരിയല്ല എന്നും കോടതി അഭിപ്രായപ്പെട്ടു. അനിശ്ചിത കാലത്തേക്ക് ഇന്റര്‍നെറ്റ് സേവനങ്ങള്‍ റദ്ദ് ചെയ്യുന്നത് ടെലികോം നിയമങ്ങളുടെ ലംഘനമാണെന്നും കോടതി നിരീക്ഷിച്ചു.
