ഐ.സി.സി ലോകകപ്പിനുള്ള 15 അംഗ ഇന്ത്യന്‍ ടീമിനെ തെരഞ്ഞെടുത്തതായി റിപ്പോര്‍ട്ട്. കഴിഞ്ഞ ദിവസം നടന്ന ഇന്ത്യ – പാകിസ്ഥാന്‍ മത്സരത്തിന് ശേഷം രാത്രിയില്‍ നടന്ന ചര്‍ച്ചകള്‍ക്കൊടുവിലാണ് ടീം തെരഞ്ഞെടുത്തത്. ദി ഇന്ത്യന്‍ എക്‌സ്പ്രസ്സാണ് ഇക്കാര്യം റിപ്പോര്‍ട്ട് ചെയ്യുന്നത്.
സെലക്ഷന്‍ കമ്മിറ്റി ചെയര്‍മാന്‍ അജിത് അഗാര്‍ക്കര്‍ കഴിഞ്ഞ ദിവസം രാത്രിയില്‍ ശ്രീലങ്കയിലെത്തുകയും ക്യാപ്റ്റന്‍ രോഹിത് ശര്‍മ, പരിശീലകന്‍ രാഹുല്‍ ദ്രാവിഡ് എന്നിവരെ കാണുകയും ചെയ്തിരുന്നു. ഇതിന് ശേഷമാണ് ടീം തെരഞ്ഞെടുത്തിരിക്കുന്നത്.
ആരാധകര്‍ ഏറെ പ്രതീക്ഷ വെച്ചുപുലര്‍ത്തിയിരുന്ന സഞ്ജു സാംസണ്‍ ലോകകപ്പിനുണ്ടാവില്ല എന്നാണ് വ്യക്തമാകുന്നത്. സഞ്ജുവിന് പുറമെ ഏഷ്യാ കപ്പ് സ്‌ക്വാഡില്‍ സ്ഥാനം നേടിയ പ്രസിദ്ധ് കൃഷ്ണ, യുവതാരം തിലക് വര്‍മ എന്നിവര്‍ക്കും ലോകകപ്പ് സ്‌ക്വാഡില്‍ ഇടം കണ്ടെത്താന്‍ സാധിച്ചിട്ടില്ല.
പരിക്കില്‍ നിന്നും മടങ്ങിയെത്തിയ സ്റ്റാര്‍ പേസര്‍ ജസ്പ്രീത് ബുംറയും പേസ് സെന്‍സേഷന്‍ മുഹമ്മദ് സിറാജും തന്നെയാണ് ബൗളിങ് യൂണിറ്റിനെ നയിക്കുന്നത്. ഇവര്‍ക്ക് പുറമെ മുഹമ്മദ് ഷമിയും പേസ് നിരയുടെ കരുത്താകുമ്പോള്‍, ചൈനമാന്‍ സ്പിന്നര്‍ കുല്‍ദീപ് യാദവിലാണ് ബി.സി.സി.ഐ വിശ്വാസമര്‍പ്പിച്ചിരിക്കുന്നത്.
കെ.എല്‍. രാഹുലിന്റെ പരിക്ക് ഇപ്പോഴും തലവേദനയായി തുടരുന്നുണ്ടെങ്കിലും അദ്ദേഹവും ലോകകപ്പ് സ്‌ക്വാഡിന്റെ ഭാഗമാണ്. പരിക്കിന് പിന്നാലെ രാഹുലിന് ഏഷ്യാ കപ്പിലെ ആദ്യ രണ്ട് മത്സരങ്ങള്‍ നഷ്ടമാകുമെന്ന് കോച്ച് രാഹുല്‍ ദ്രാവിഡ് പറഞ്ഞിരുന്നു.
സെപ്റ്റംബര്‍ അഞ്ചിനാണ് ലോകകപ്പിനുള്ള അന്തിമ പട്ടിക സമര്‍പ്പിക്കേണ്ടത്. സെപ്റ്റംബര്‍ നാലിന് ബി.സി.സി.ഐ സെലക്ഷന്‍ കമ്മിറ്റി യോഗം ചേര്‍ന്ന ശേഷം ടീം പ്രഖ്യാപിക്കുമെന്നായിരുന്നു നേരത്തെ അറിയിച്ചിരുന്നത്. എന്നാല്‍ മെഡിക്കല്‍ ടീം കെ.എല്‍. രാഹുലിന് ഗ്രീന്‍ സിഗ്നല്‍ നല്‍കിയതോടെയാണ് ടീം ഫൈനലൈസ് ചെയ്തത്.
രാഹുലിന്റെ പരിക്കിന്റെ കാര്യത്തില്‍ അനിശ്ചിതത്വം തുടരുന്നതിനാലാണ് ഏഷ്യാ കപ്പില്‍ സഞ്ജു സാംസണ്‍ ട്രാവലിങ് സ്റ്റാന്‍ഡ് ബൈ ആയി ടീമിനൊപ്പം ചേര്‍ന്നത്. കെ.എല്‍. രാഹുലിന്റെ ആരോഗ്യനിലയില്‍ മെഡിക്കല്‍ ടീം തൃപ്തി പ്രകടപ്പിച്ചതോടെ രണ്ടാം വിക്കറ്റ് കീപ്പര്‍ ആരായിരിക്കണമെന്നും ബി.സി.സി.ഐക്ക് വ്യക്തമായിരിക്കുകയാണ്.
