വിജയ് നായകനാവുന്ന ചിത്രം വാരിസിനായുള്ള കാത്തിരിപ്പിലാണ് തെന്നിന്ത്യന്‍ സിനിമ ലോകം. ഇന്ത്യന്‍ സിനിമാ ലോകത്തെ ഏറ്റവും വലിയ ക്രൗഡ് പുള്ളര്‍മാരില്‍ ഒരാളായ വിജയ്‌യുടെ ചിത്രം വന്നാല്‍ തിയേറ്ററുകള്‍ നിറയുമെന്ന കാര്യം ഉറപ്പാണ്.
ചിത്രത്തിലെ ആദ്യ പാട്ടിന്റെ പ്രൊമോ വീഡിയോ കഴിഞ്ഞ ദിവസം പുറത്ത് വന്നിരുന്നു. പാട്ടിന്റെ ലിറിക്കല്‍ വീഡിയോ പുറത്ത് വിട്ടിരിക്കുകയാണിപ്പോള്‍. തട്ടുപൊളിപ്പന്‍ തമിഴ് സ്റ്റൈലില്‍ ഒരുക്കിയ പാട്ടില്‍ വിജയ്‌ക്കൊപ്പം രശ്മിക മന്ദാനയുമുണ്ട്. രഞ്ചിതമേ എന്ന് തുടങ്ങുന്ന പാട്ടിന്റെ അവസാന നിമിഷങ്ങളില്‍ ഒരു കൊട്ടിക്കലാശമാണ് ഒരുക്കിയിരിക്കുന്നത്. വിജയ് ആരാധകര്‍ക്കായുള്ള ഒരു വിരുന്ന് തന്നെയാണ് പാട്ട്.
വംശി പെഡിപ്പള്ളി സംവിധാനം ചെയ്യുന്ന ചിത്രത്തില്‍ ഒരു ആപ്പ് ഡിസൈനറായാണ് വിജയ് അഭിനയിക്കുന്നത്. വിജയ് എന്ന് തന്നെയാണ് ചിത്രത്തിലെ കഥാപാത്രത്തിന്റെ പേര്.
