ന്യൂദല്‍ഹി: ശാസ്ത്രജ്ഞരായ ആല്‍ബര്‍ട്ട് ഐന്‍സ്റ്റീന്‍, സ്റ്റീഫന്‍ ഹോക്കിങ്‌സ്, ഐസക് ന്യൂട്ടന്‍ എന്നിവരുടെ തിയറികള്‍ തെറ്റാണെന്ന് ഇന്ത്യന്‍ സയന്‍സ് കോണ്‍ഗ്രസില്‍ പ്രാസംഗികന്‍. ഡോ. കണ്ണന്‍ ജഗതാല കൃഷ്ണന്റെ പ്രസംഗത്തിലാണ് ഇക്കാര്യങ്ങള്‍ പറയുന്നത്.
” എല്ലാ ഫിസിക്‌സ് തിയറികളും തെറ്റാണ്. എന്നാല്‍ പരീക്ഷണങ്ങള്‍ ശരിയാണ്. എന്റെ തിയറി എല്ലാം വിശദീകരിക്കും. ” അദ്ദേഹം പറഞ്ഞു.
അദ്ദേഹത്തിന്റെ തിയറി സ്വീകരിക്കുകയാണെങ്കില്‍ ഗുരുത്വാകര്‍ഷണ തരംഗങ്ങള്‍ക്ക് “നരേന്ദ്രമോദി തരംഗം” എന്ന് പേരുനല്‍കണം. ഗുരുത്വാകര്‍ഷണ ലെന്‍സിങ് പ്രഭാവത്തെ (പ്രകാശത്തിനും ഉറവിടത്തിനും ഇടയില്‍ വസ്തുവിന്റെ സാന്നിധ്യം കാരണം പ്രകാശ കിരണം വളയുന്ന പ്രതിഭാസം) കേന്ദ്ര ശാസ്ത്ര സാങ്കേതിക വകുപ്പു മന്ത്രിയുടെ പേരു ചേര്‍ത്ത് “ഹര്‍ഷ വര്‍ധന്‍ ഇഫക്ട്” എന്ന് വിളിക്കണമെന്നും അദ്ദേഹം പറഞ്ഞു.
“സൂര്യന്റെ ആകര്‍ഷണം കാരണം ഗ്രഹങ്ങള്‍ നീങ്ങുന്നില്ല. അത് സൂര്യന്റെ ഗുരുത്വാകര്‍ഷണം കൊണ്ടാണെങ്കില്‍ സൂര്യനേക്കാള്‍ വലിയ കുറേ സാറ്റലൈറ്റുകളുണ്ടല്ലോ, അവയൊന്നും സൂര്യനെ ആകര്‍ഷിക്കാത്തതെന്താണ്? ബഹിരാകാശം അതിന്റെ പ്രതലത്തില്‍ തുല്യ ബലം പ്രയോഗിക്കുന്നതുകൊണ്ടാണ് ഗ്രഹങ്ങള്‍ ചലിക്കുന്നത്. ഒരു യുറാനിയം കണിക വിഘടിക്കുമ്പോള്‍ അല്പം ദ്രവ്യം ഇല്ലാതാകുന്നത് ഐന്‍സ്റ്റീന്റെ ശ്രദ്ധയില്‍പ്പെട്ടപ്പോള്‍ അദ്ദേഹം പറഞ്ഞു ഊര്‍ജ്ജം എന്നത് ഈ നഷ്ടമായ ദ്രവ്യത്തെ പ്രകാശവേഗതയുടെ വര്‍ഗ്ഗംകൊണ്ട് ഗുണിച്ചതിന് തുല്യമാകുമെന്ന്. എന്നാല്‍ അദ്ദേഹത്തിന് ഊര്‍ജ്ജമെന്താണെന്ന് മനസിലായില്ല. ഭൂമിയും മറ്റ് ഗ്രഹങ്ങളും സ്ഥിരം ചലിച്ചുകൊണ്ടിരിക്കുന്നുണ്ട്. അതിന് ഊര്‍ജ്ജം ആവശ്യമുണ്ട്. ആ ഊര്‍ജ്ജം ബഹിരാകാശമാണ്.” കൃഷ്ണന്‍ പറഞ്ഞു.
വേള്‍ഡ് കമ്മ്യൂണിറ്റി സര്‍വ്വീസ് സെന്ററുമായി ബന്ധപ്പെട്ട് പ്രവര്‍ത്തിക്കുന്നയാളാണ് കൃഷ്ണന്‍.