കോതമംഗലം: കോതമംഗലത്ത് കുട്ടമ്പുഴയിൽ വനത്തിൽ കാണാതായ മൂന്ന് സ്ത്രീകളെയും കണ്ടെത്തി. വനത്തിന്റെ ആറ് കിലോമീറ്റർ ഉള്ളിലായി അറക്കമുത്തി ഭാഗത്തായാണ് സ്ത്രീകളെ കണ്ടെത്തിയത്.

മൂന്ന് പേരും സുരക്ഷിതരാണെന്ന് മലയാറ്റൂർ ഡി.എഫ്.ഒ ശ്രീനിവാസ് പറഞ്ഞു.

‘മൂന്നുപേരും സുരക്ഷിതരാണ്. അവർക്ക് കാര്യമായ ആരോഗ്യ പ്രശ്നങ്ങൾ ഒന്നും തന്നെ ഇല്ല. മൂന്നുപേരും ഉള്ളത് അറക്കമുത്തി ഭാഗത്താണ്. അവിടെ നിന്ന് നടന്ന് തന്നെയാകും എല്ലാവരെയും തിരിച്ചെത്തിക്കുക. ആരോഗ്യ പ്രശ്നങ്ങൾ ഒന്നും തന്നെ ഇല്ലാത്തതിനാൽ നടക്കാൻ ബുദ്ധിമുട്ടില്ലെന്ന് അവർ പറഞ്ഞിട്ടുണ്ട്,’ മലയാറ്റൂർ ഡി.എഫ്.ഒ പറഞ്ഞു.

ഇന്നലെ വൈകുന്നേരമാണ് പശുക്കളെ തിരഞ്ഞ് പോയ സ്ത്രീകളെ കൊടുംവനത്തിൽ കാണാതായത്. പൊലീസും അഗ്നിരക്ഷാ സേനയും വനംവകുപ്പും നാട്ടുകാരും ചേർന്ന് തിരച്ചിൽ നടത്തിയെങ്കിലും ഇന്നലെ ഇവരെ കണ്ടെത്താനായിരുന്നില്ല.

കുട്ടമ്പുഴ അട്ടിക്കളം വനമേഖലയിലെ മാളോക്കുടി മായാ ജയൻ, കാവുംപടി പാറുക്കുട്ടി കുഞ്ഞുമോൻ, പുത്തൻപുര ഡാർളി സ്റ്റീഫൻ എന്നിവരെയാണ് കാണാതായിരുന്നത്.

പശുവിനെ തേടിപ്പോകും വഴി കാട്ടാനയെ കണ്ടതോടെ തങ്ങൾ ചിതറിയോടി എന്ന് 4.15ന് മായ ഭർത്താവിനെ ഫോണിൽ വിളിച്ച് അറിയിച്ചിരുന്നു. പാറപ്പുറത്ത് ഇരിക്കുകയാണെന്നും വെള്ളം കൊണ്ടുവരണമെന്നും ആവശ്യപ്പെട്ടിരുന്നു. ഇന്നലെ തിരയാൻ പോയവരും ആനകളുടെ മുൻപിൽ പെട്ടിരുന്നു.

Content Highlight: relief; Missing women found in forest