വെള്ളിയാഴ്ച റിലീസ് ചെയ്യാനിരുന്ന പടങ്ങള്‍ മാറ്റി; മമ്മൂട്ടി ചിത്രം പ്രീസ്റ്റിന്റെ റിലീസും അനിശ്ചിതത്തില്‍; മുഖ്യമന്ത്രിക്ക് കത്ത് നല്‍കി ഫിലിം ചേംബര്‍
എന്റര്‍ടെയിന്‍മെന്റ് ഡെസ്‌ക്
Thursday, 25th February 2021, 12:55 pm
കൊച്ചി: സിനിമാ മേഖലയില്‍ പ്രതിസന്ധി രൂക്ഷമാവുന്നു. തിയേറ്ററുകളില്‍ വെള്ളിയാഴ്ച റിലീസ് ചെയ്യാനിരുന്ന സിനിമകളുടെ റിലീസ് മാറ്റി. നിര്‍മ്മാതാക്കള്‍ക്കും വിതരണക്കാര്‍ക്കും തിയേറ്റര്‍ ഉടമകള്‍ക്കും സിനിമകള്‍ റിലീസ് ചെയ്താല്‍ നഷ്ടം വരുമെന്ന് കാണിച്ചാണ് പുതിയ റിലീസുകള്‍ മാറ്റിയത്.
നേരത്തെ റിലീസ് ചെയ്ത മലയാള സിനിമകളില്‍ ഒാപ്പറേഷന്‍ ജാവ ഒഴികെയുള്ള സിനിമകള്‍ക്ക് കാര്യമായ നേട്ടം ബോക്‌സ് ഓഫീസില്‍ നിന്ന് ഉണ്ടായിരുന്നില്ല. നിലവിലെ സാഹചര്യങ്ങളില്‍ വിവിധ ആവശ്യങ്ങള്‍ മുന്‍ നിര്‍ത്തി ഫിലിം ചേംബര്‍ മുഖ്യമന്ത്രിക്ക് കത്ത് നല്‍കി.
സിനിമ വ്യവസായം വന്‍നഷ്ടത്തിലാണെന്നും നിലവില്‍ മാര്‍ച്ച് 31 വരെ സര്‍ക്കാര്‍ അനുവദിച്ച വിനോദ നികുതി ഇളവ് തിയേറ്ററുകളുടെ അവസ്ഥ മെച്ചപ്പെടുന്നത് വരെ തുടരണമെന്നും കത്തില്‍ ആവശ്യപ്പെടുന്നുണ്ട്.
