സെഞ്ചൂറിയന്‍: ബോളിവുഡിന് പിന്നാലെ കായിക ലോകവും പാഡ് മാന്‍ ചലഞ്ച് ഏറ്റെടുക്കുകയാണ്. ഇന്ത്യന്‍ ക്രിക്കറ്റ് ടീം പരിശീലകന്‍ രവിശാസ്ത്രിയാണ് ഏറ്റവും ഒടുവിലായി ചലഞ്ച് ഏറ്റെടുത്ത് രംഗത്തെത്തിയിരിക്കുന്നത്. നേരത്തെ പി.വി സിന്ധുവടക്കമുള്ള താരങ്ങള്‍ അക്ഷയ് കുമാര്‍ തുടങ്ങി വെച്ച ചലഞ്ചിന്റെ ഭാഗമായിരുന്നു.
സാനിറ്ററി പാഡുമായി നില്‍ക്കുന്ന തന്റെ ചിത്രം പോസ്റ്റ് ചെയ്താണ് രവി ശാസ്ത്രി സോഷ്യല്‍ മീഡിയ ക്യാമ്പയിന്റെ ഭാഗമായത്. ഇന്ത്യന്‍ ടീം ക്യാപ്റ്റന്‍ വിരാട് കോഹ് ലിയേയും ടെന്നീസ് താരം ലിയാണ്ടര്‍ പെയ്‌സിനേയും വെല്ലുവിളി ഏറ്റെടുക്കാന്‍ രവി ശാസ്ത്രി ക്ഷണിക്കുകയും ചെയ്തിട്ടുണ്ട്.
Yes, it’s a Pad in my hand. Happy to support rockstar @akshaykumar for breaking the taboo and initiating an open conversation. AK, am sure no ball is going to hit PAD (MAN). #PadManChallenge Here I challenge @imVkohli @SinghaniaGautam @Leander pic.twitter.com/FXdK3py7gW
— Ravi Shastri (@RaviShastriOfc) February 6, 2018
അക്ഷയ് കുമാറും സോനം കപൂറും തുടങ്ങി വെച്ച പാഡ്മാന്‍ ചലഞ്ചിനിന്റെ ഭാഗമായി നിരവധി താരങ്ങളാണ് ട്വീറ്റുകളുമായി സോഷ്യല്‍ മീഡിയയില്‍ പ്രത്യക്ഷപ്പെട്ടിരിക്കുന്നത്.
ചെലവു കുറഞ്ഞ സാനിറ്ററി പാഡുകള്‍ നിര്‍മ്മിക്കാനുള്ള മെഷ്യനുകള്‍ കണ്ടെത്തിയ സംരംഭകനായ അരുണാചലം മുരുകാന്ദമിന്റെ ജീവിതകഥ പറയുന്ന അക്ഷയ് കുമാര്‍ നായകനാകുന്ന ചിത്രമാണ് പാഡ്മാന്‍. ചിത്രത്തിന്റെ പ്രചരണാര്‍ത്ഥം അരുണാചലമാണ് സോഷ്യല്‍ മീഡിയയില്‍ പാഡ്മാന്‍ ചലഞ്ച് ആരംഭിച്ചത്. ചിത്രത്തിലെ നായകനായ അക്ഷയ്കുമാറിനോടും സോനം കപൂറിനോടും സാനിറ്ററി നാപ്കിനുമായി നില്‍ക്കുന്ന ചിത്രം പോസ്റ്റ് ചെയ്യാന്‍ പറഞ്ഞായിരുന്നു ചലഞ്ച്.
അക്ഷയ് കുമാറും സോനവും വെല്ലു വിളി സ്വീകരിക്കുകയും മറ്റുള്ളവരോട് അത് ഏറ്റെടുക്കാന്‍ ആവശ്യപ്പെടുകയും ചെയ്തു. പിന്നാലെ ബോളിവുഡ് താരങ്ങളായ ആമിര്‍ ഖാന്‍, ആലിയ ഭട്ട്, ട്വിങ്കിള്‍ ഖന്ന, അനില്‍ കപൂര്‍, രാജ്കുമാര്‍ റാവു തുടങ്ങിയവരും സാനിറ്ററി നാപ്കിനുമായി സോഷ്യല്‍ മീഡിയയില്‍ പ്രത്യക്ഷപ്പെട്ടു.
ദീപിക പദുക്കോണും അര്‍ജുന്‍ കപൂറും അയുഷ്മാന്‍ ഖുറാനയുമെല്ലാം ചലഞ്ച് ഏറ്റെടുത്ത് രംഗത്തെത്തിയിട്ടുണ്ട്. പീരിയഡ്സ് സ്വാഭാവികമായ കാര്യമാണെന്നും അതില്‍ നാണംകെടാന്‍ ഒന്നുമില്ലെന്നാണ് ബോളിവുഡ് ഒന്നടങ്കം പറയുന്നത്. പി.വി സിന്ധുവിന് പിന്നാലെ ഗുസ്തി താരം ഗീതാ ഫോഘട്ടും പാഡ്മാന്‍ ചലഞ്ച് ഏറ്റെടുത്ത് രംഗത്തെത്തിയിരുന്നു.