നാല് പതിറ്റാണ്ടോളമായി മലയാള സിനിമയുടെ തലപ്പത്ത് നിൽക്കുന്ന നടന്മാരാണ് മമ്മൂട്ടിയും മോഹൻലാലും. എൺപതുകൾ മുതൽ മലയാളികൾ കാണുന്ന ഈ മുഖങ്ങൾ മലയാള സിനിമയുടെ യശസ് മറ്റ് ഭാഷകൾക്ക് മുന്നിൽ ഉയർത്തുന്നതിൽ വലിയ പങ്കുവഹിച്ചിട്ടുണ്ട്. സൂപ്പർ സ്റ്റാറുകൾ എന്നതിനുപരി മികച്ച നടന്മാരായും നിലനിൽക്കുന്ന മമ്മൂട്ടിയും മോഹൻലാലും എന്നും മലയാളികളുടെ അഭിമാനമാണ്.

അതുകൊണ്ടുതന്നെ ഇരുവരും ഒന്നിക്കുന്ന ഒരു സിനിമക്കായി നാളേറെയായി മലയാളികൾ കാത്തിരിക്കുകയാണ്. 2013 ൽ ഇറങ്ങിയ കടൽ കടന്നൊരു മാത്തുക്കുട്ടി എന്ന ചിത്രത്തിന് ശേഷം  ഇരുവരും ഒന്നിച്ചൊരു സിനിമ വന്നിട്ടില്ല.

ഹരികൃഷ്ണൻസ്, നരസിംഹം, ഗാന്ധി നഗർ സെക്കന്റ് സ്ട്രീറ്റ് തുടങ്ങി ഇരുവരും ഒന്നിച്ചപ്പോഴെല്ലാം പ്രേക്ഷകർ ഇരുകയ്യും നീട്ടി സ്വീകരിച്ചിട്ടുണ്ട്. എന്നാൽ പ്രതീക്ഷകൾക്ക് ചിറകേകി കൊണ്ട് സംവിധായകൻ മഹേഷ് നാരായണൻ സംവിധാനം ചെയ്യുന്ന അടുത്ത ചിത്രത്തിൽ മമ്മൂട്ടിയും മോഹൻലാലും വീണ്ടുമൊന്നിക്കുന്നുവെന്ന വാർത്തകൾ വന്നിരുന്നു.

ചിത്രത്തിന്റേതായി ഇന്നിറങ്ങിയ സ്റ്റില്ലുകൾ സോഷ്യൽ മീഡിയ ഏറ്റെടുത്തിരിക്കുകയാണ്. മമ്മൂട്ടിക്കും മോഹൻലാലിനൊപ്പം കുഞ്ചാക്കോ ബോബനെയും ഫോട്ടോയിൽ കാണാം. ചിത്രത്തിലെ മമ്മൂട്ടിയുടേയും മോഹൻലാലിന്റേയും ഗെറ്റപ്പിനെ കുറിച്ച് സംസാരിക്കുകയാണ് മേക്കപ്പ് മാൻ രഞ്ജിത്ത് അമ്പാടി. രണ്ടുപേരുടെയും കിടിലൻ ലുക്ക് പ്രതീക്ഷിക്കാമെന്നും മോഹൻലാലിൻറെ ലുക്കിൽ തീർച്ചയായും വ്യത്യസ്‍തത ഉണ്ടാവുമെന്നും രഞ്ജിത്ത് അമ്പാടി പറയുന്നു. റിപ്പോർട്ടർ ടി.വിയോട് സംസാരിക്കുകയായിരുന്നു അദ്ദേഹം.

‘മഹേഷ്‌ നാരായണന്റെ പുതിയ സിനിമ ശ്രീലങ്കയിൽ തുടങ്ങുകയാണ്. അത് വലിയൊരു സിനിമയാണ്. ലാലേട്ടൻ, മമ്മൂക്ക, ഫഹദ്, ചാക്കോച്ചൻ എല്ലാവരും അതിലുണ്ട്. മഹേഷിന്റെ വർക്ക്‌ നമുക്കൊക്കെ അറിയുന്നതല്ലേ, ഓൾറെഡി ടേക്ക് ഓഫും മാലിക്കുമൊക്കെ നമുക്ക് അറിയുന്നതല്ലേ. മഹേഷിന്റെ ഒരു രീതി നമുക്കറിയാം. പിന്നെ അവരൊക്കെ തെരഞ്ഞെടുക്കുന്ന സിനിമകളും നമുക്കറിയാമല്ലോ. എന്തായാലും ഒരു സാധ സിനിമയായിരിക്കില്ല.

മമ്മൂക്കയുടെ ഒരു കിടിലൻ ലുക്ക് തീർച്ചയായും സിനിമയിൽ പ്രതീക്ഷിക്കാം. ലാലേട്ടന്റെ ലുക്കിലും എന്തായാലും മാറ്റം ഉണ്ടാവും. ഇപ്പോൾ ഷൂട്ട്‌ ചെയ്യാൻ പോവുന്നത് ഒരു വലിയ ഷെഡ്യൂളല്ല. കുറച്ച് ദിവസത്തെ ഷെഡ്യൂളാണ് ഇപ്പോൾ ഷൂട്ട്‌ ചെയ്യുന്നത്. ശരിക്കുമുള്ള ഷൂട്ട്‌ ജനുവരിയൊക്കെ ആയിട്ടാണ് തുടങ്ങുക. ഇനിയും ഒരുപാട് മീറ്റിങ്ങുണ്ട് ചർച്ചകളുണ്ട്. അതൊന്നും ഫൈനലായിട്ടില്ല. ലാലേട്ടന്റെ ഒരു കിടിലൻ ലുക്ക് എന്തായാലും പ്രതീക്ഷിക്കാം. ആ സിനിമയുടെ എല്ലാ കാര്യങ്ങളും കുറച്ച് സസ്പെൻസാണ്,’രഞ്ജിത്ത് അമ്പാടി പറയുന്നു.

Content Highlight: Ranjith Ambadi About Getup’s Of Mammooty And Mohanlal In Mahesh Narayanan Film