കൊച്ചി: നിര്‍മല്‍ സഹദേവിന്റെ “രണം” എന്ന ചിത്രത്തിലെ റഹ്മാന്റെ കഥാപാത്രത്തെ അവതരിപ്പിക്കുന്ന ടീസര്‍ പുറത്തിറക്കി. ദാമോദര്‍ രത്‌നം എന്ന കഥാപാത്രത്തെയാണ് റഹ്മാന്‍ ചിത്രത്തില്‍ അവതരിപ്പിക്കുന്നത്. നന്നായി അതിജീവിക്കുന്നവര്‍ “അതിശക്തരോ ബുദ്ധിമാന്മാരോ അല്ല, മറിച്ച് മാറ്റത്തെ മികച്ച രീതിയില്‍ കൈകാര്യം ചെയ്യുന്നവരാണ്” എന്ന് “ദാമോദര്‍സ് ലോ ഓഫ് സര്‍വൈവല്‍” പറഞ്ഞുവെക്കുന്നു.
നിര്‍മല്‍ സഹദേവിന്റെ ആദ്യ ചിത്രമായ രണത്തിന്റെ മുന്‍ ടീസറുകള്‍ക്കും മികച്ച സ്വീകരണമാണ് പ്രേക്ഷകര്‍ നല്‍കിയത്. റഹ്മാനെ കൂടാതെ, പൃഥ്വിരാജും ഇഷ തല്‍വാറും ചിത്രത്തില്‍ പ്രധാനപ്പെട്ട കഥാപാത്രങ്ങളെ അവതരിപ്പിക്കുന്നുണ്ട്.
ജേക്‌സ് ബിജോയിയാണ് ഈ ചിത്രത്തിന് സംഗീതം നല്‍കുന്നത്. ജിഗ്മി ടെന്‍സിങ് ഛായാഗ്രഹണം നിര്‍വഹിക്കുന്ന ചിത്രം ആനന്ദ് പയ്യന്നൂര്‍, ലോസണ്‍ ബിജു എന്നിവര്‍ ചേര്‍ന്നാണ് നിര്‍മിക്കുന്നത്.