തിരുവനന്തപുരം: സി.പി.ഐ.എം ഇടുക്കി ജില്ലാ സെക്രട്ടറി സി.വി. വര്‍ഗീസ് കെ.സുധാകരനെതിരെ നടത്തിയത് വിലകുറഞ്ഞ പ്രസ്താവനയാണെന്ന് രമേശ് ചെന്നിത്തല എം.എല്‍.എ. പ്രകോപനപരവും തരം താഴ്ന്നതുമായ പ്രസ്താവന നടത്തുന്നവരെ സെക്രട്ടറി ആക്കുന്ന നിലയിലേക്ക് സി.പി.ഐ.എം അധപതിച്ചിരിക്കുന്നുവെന്നും ചെന്നിത്തല പറഞ്ഞു. ഫേസ്ബുക്ക് പോസ്റ്റിലൂടെയായിരുന്നു ചെന്നിത്തലയുടെ പ്രതികരണം.
‘സി.പി.ഐ.എം ഇടുക്കി ജില്ലാ സെക്രട്ടറി കെ.സുധാകരനെതിരെ നടത്തിയത് വിലകുറഞ്ഞ പ്രസ്താവനയാണ്. ജില്ലാ സെക്രട്ടറിക്കെതിരെ ജാമ്യമില്ലാ വകുപ്പ് ചുമത്തി കേസെടുക്കണം.
പ്രസ്താവന നിയമവാഴ്ചയോടുള്ള വെല്ലുവിളിയാണ്. സുധാകരന് കെ.പി.സി.സിയുടെ പ്രസിഡന്റ് ആണെന്ന കാര്യം ജില്ലാ സെക്രട്ടറി മറക്കരുത്.
ഇത്തരം പ്രകോപനപരവും തരം താഴ്ന്നതുമായ പ്രസ്താവന നടത്തുന്നവരെ സെക്രട്ടറി ആക്കുന്ന നിലയിലേക്ക് സി.പി.എം അധപതിച്ചിരിക്കുന്നു. കൊലപതക രാഷ്ടീയത്തിന്റെ വക്താക്കളാണു സി.പി.ഐ.എം എന്നു തെളിയിക്കുന്നതാണു ജില്ലാ സെക്രട്ടറിയുടെ പ്രസംഗം,’ രമേശ് ചെന്നിത്തല കൂട്ടിച്ചേര്‍ത്തു.
വിഷയത്തില്‍ പ്രതികരണവുമായി പ്രതിപക്ഷ നേതാവ് വി.ഡി. സതീശനും രംഗത്തെത്തിയിരുന്നു. ധീരജിന്റെ കൊലപാതകവുമായി ബന്ധപ്പെട്ട് സി.വി. വര്‍ഗീസിനെ പൊലീസ് ചോദ്യം ചെയ്യണമെന്ന് സതീശന്‍ പറഞ്ഞിരുന്നു. കാലന്റെ റോള്‍ കൈകാര്യം ചെയ്യുന്നത് സി.പി.ഐ.എം നേതാക്കളാണെന്നാണ് അവരുടെ ധാരണയെന്നും അദ്ദേഹം പറഞ്ഞു.
‘ധീരജിന്റെ കൊലപാതകവുമായി ബന്ധപ്പെട്ട് സി.വി. വര്‍ഗീസിനെ വിളിച്ച് ചോദ്യം ചെയ്യണം. കൊലപാതകവുമായി ബന്ധപ്പെട്ട് ഒരുപാട് വിവരങ്ങള്‍ ജില്ലാ സെക്രട്ടറിക്ക് അറിയാം. കെ.പി.സി.സി പ്രസിഡന്റിനെതിരെ പറയാനുള്ള ധിക്കാരമാണ്, തെരുവ് ഗുണ്ടയുടെ സ്വഭാവമാണ് അദ്ദേഹം കാണിച്ചിരിക്കുന്നത്. കേരളത്തില്‍ കാലന്റെ റോള്‍ മുഴുവന്‍ കൈകാര്യം ചെയ്യുന്നത് സി.പി.ഐ.എം നേതാക്കളാണെന്നുള്ള ധാരണയാണ് അവര്‍ക്ക്. അതൊന്നും കോണ്‍ഗ്രസിന്റെ അടുത്ത് വിലപോകില്ല.
കെ. സുധാകരന്റെ ദേഹത്ത് ഒരു നുള്ള് മണ്ണ് വാരിയിടാന്‍ കേരളത്തിലെ സി.പി.ഐ.എമ്മുകാരെ കോണ്‍ഗ്രസുകാര്‍ സമ്മതിക്കില്ല. ഒരു ഭീഷണിയും വേണ്ട. കേരളത്തില്‍ ഇപ്പോള്‍ ഗുണ്ടാ കോറിഡോറാണ്. ആ ഗുണ്ടകള്‍ക്ക് മൊത്തം സഹായം ചെയ്യുന്നത് സി.പി.ഐ.എം ജില്ലാ സെക്രട്ടറിയെ പോലുള്ള നേതാക്കളാണ്.
