തിരുവനന്തപുരം: തലശ്ശേരിയില്‍ കാറില്‍ ചാരിനിന്നതിന്റെ പേരില്‍ ആറ് വയസുകാരനെ ചവിട്ടിവീഴ്ത്തിയ സംഭവത്തില്‍ പ്രിതകരണവുമായി രമേശ് ചെന്നിത്തല എം.എല്‍.എ. ഇത്രയും നീചന്മാര്‍ ഈ കാലഘട്ടത്തിലും ഉണ്ടോയെന്ന് ചെന്നിത്തല ചോദിച്ചു.
മറ്റ് സംസ്ഥാനങ്ങളില്‍ നിന്നും വരുന്ന തൊഴിലാളികളെ അന്യസംസ്ഥാന തൊഴിലാളികളായി കാണാതെ അതിഥി തൊഴിലാളികളായി കാണുന്ന നാടാണ് കേരളം. പക്ഷേ ഇന്നലെ നാം തലശ്ശേരിയില്‍ കണ്ട ദൃശ്യങ്ങള്‍ കേരളമൊട്ടാകെ തലകുനിക്കേണ്ട ഒരു സംഭവമാണ്.
അതിഥിയായി കേരളത്തില്‍ എത്തിയ ആറു വയസ്സു മാത്രം പ്രായമുള്ള ഒരു ബാലകന്‍ തന്റെ കാറില്‍ ഒന്ന് ചാരിനിന്നു എന്ന കാരണത്താല്‍ കാറുടമസ്ഥന്‍ ആ പിഞ്ചു കുഞ്ഞിന്റെ നെഞ്ചില്‍ തന്റെ കാല്‍ പതിപ്പിച്ചത് ഏറ്റവും നീചകമായ ഒരു സംഭവം തന്നെയാണ്. എല്ലാ സൂചികയിലും മികച്ചതായിരുന്ന നമ്മുടെ സംസ്ഥാനം ഇന്നു ഭയാശങ്കയുടെ പിടിയിലായതിന്റെ തെളിവാണ് അടിക്കടി ഉണ്ടാക്കുന്ന ഇത്തരം സംഭവങ്ങളെന്നും ചെന്നിത്തല പറഞ്ഞു.
