നിവിന് പോളിയെ നായകനാക്കി ഹനീഫ് അദേനി തിരക്കഥയും സംവിധാനവും നിര്‍വഹിക്കുന്ന ‘രാമചന്ദ്രബോസ് ആന്‍ഡ് കോയുടെ ട്രെയ്ലര് പുറത്ത്.
ഓണം റിലീസ് ആയിട്ടാണ് ചിത്രം തിയേറ്ററില്‍ എത്തുന്നത്. ചിത്രത്തിന് സെന്‍സര്‍ ബോര്‍ഡ് യു എ സര്‍ട്ടിഫിക്കറ്റ് നല്‍കിയിരിരുന്നു.
മാജിക്ക് ഫ്രെയിമ്‌സിന്റെ യൂട്യൂബ് ചാനല്‍ വഴിയാണ് ട്രെയ്ലര് റിലീസ് ചെയ്തിരിക്കുന്നത്. മികച്ച പ്രതികരണമാണ് ട്രെയ്ലറിന് ഇതിനോടകം ലഭിക്കുന്നത്. 2മിനിറ്റും 26 സെക്കന്റും ദൈര്‍ഘ്യം ഉള്ളതാണ് ട്രെയ്ലര്.
മുമ്പ് ഓണത്തിന് ഇറങ്ങിയ ചിത്രങ്ങള്‍ നിവിന് വിജയം നേടിക്കൊടുത്ത് ചരിത്രമുണ്ടായിട്ടുണ്ട്. 2017ല്‍ അല്‍ത്താഫിന്റെ സംവിധാനത്തില്‍ എത്തിയ ഞണ്ടുകളുടെ നാട്ടില്‍ ഒരിടവേള 2019ല്‍ പുറത്തിറങ്ങിയ ധ്യാന്‍ ശ്രീനിവാസന്‍ സംവിധാനം നിര്‍വഹിച്ച ലൗ ആക്ഷന്‍ ഡ്രാമ എന്നീ ചിത്രങ്ങളും ആ വര്‍ഷങ്ങളില്‍ മികച്ച വിജയം നിവിന് നേടിക്കൊടുത്തിരുന്നു. നിവിന്റെ ഈ ഓണച്ചിത്രം എങ്ങനെയാവും എന്ന ആകാംക്ഷയിലാണ് ആരാധകര്‍.
ചിരികളാല്‍ സമ്പന്നമായ ഒരു കൊളളയുടെ കഥയാണ് ചിത്രം പറയുന്നത്. പ്രവാസി ഹൈസ്റ്റ് എന്ന ടാഗ് ലൈനോട് കൂടിയാണ് ചിത്രം എത്തുന്നത്. യു.എ.ഇയിലും കേരളത്തിലുമായാണ് ചിത്രത്തിന്റെ ഷൂട്ടിങ് നടന്നത്. വളരെയധികം ആകാംക്ഷയോടെ ആരാധകര്‍ കാത്തിരിക്കുന്ന ചിത്രം കൂടിയാണ് ഇത്. മാജിക് ഫ്രെയിംസും പോളി ജൂനിയര്‍ പിക്‌ചേഴ്‌സും ചേര്‍ന്നാണ് രാമചന്ദ്ര ബോസ് ആന്‍ഡ് കോ നിര്‍മിക്കുന്നത്.
നിവിന് പോളിക്ക് ഒപ്പം ജാഫര്‍ ഇടുക്കി, വിനയ് ഫോര്‍ട്ട്, വിജിലേഷ്, മമിത ബൈജു, ആര്‍ഷ ബൈജു തുടങ്ങിയവരും ചിത്രത്തില്‍ അഭിനയിക്കുന്നുണ്ട്. വിഷ്ണു തണ്ടാശേരിയാണ് ചിത്രത്തിനായി ക്യാമറ ചലിപ്പിക്കുന്നത്.
