എസ്.എസ് രാജമൗലിയുടെ സംവിധാനത്തില്‍ രാംചരണും ജൂനിയര്‍ എന്‍.ടി.ആറും അഭിനയിച്ച ആര്‍.ആര്‍.ആര്‍ വലിയ വിജയമായിരുന്നു.
2022 മാര്‍ച്ച് 24ന് തിയേറ്ററുകളില്‍ എത്തിയ ചിത്രം സകല കളക്ഷന്‍ റെക്കോഡുകള്‍ തകര്‍ത്താണ് തിയേറ്റര്‍ വിട്ടത്. പിന്നീട് നെറ്റ്ഫ്‌ലിക്സിലൂടെയും ചിത്രത്തിന് വലിയ സ്വീകരണം ലഭിച്ചിരുന്നു.
ഇന്ത്യക്ക് പുറത്ത് ചിത്രം ഏറെ ചര്‍ച്ചയാവുകയും ചെയ്തതാണ്. ഹോളിവുഡ് സംവിധായകരും, സാങ്കേതിക പ്രവര്‍ത്തകരും ഒക്കെ ചിത്രത്തെയും സിനിമയിലെ താരങ്ങളുടെ പ്രകടനത്തെയും പ്രശംസിച്ച് രംഗത്ത് എത്തിയിരുന്നു.
ഇപ്പോഴിതാ മാര്‍വലിന്റെ പ്രശസ്ത സീരിസായ ലുക്ക് കേജിന്റെ എഴുത്തുകാരനായ ചിയോ ഹോദാരി കോക്കറും ആര്‍.ആര്‍.ആറിലെ പ്രകടനം വെച്ച് രാം ചരണിനെ പ്രശംസിച്ച് എത്തിയിരിക്കുകയാണ്.
അടുത്ത ജെയിംസ് ബോണ്ട് ആകാന്‍ അര്‍ഹരെന്ന് തോന്നുന്നവരുടെ ലിസ്റ്റിലേക്കാണ് ചിയോ രാം ചരണിനെ ഉള്‍പ്പെടുത്തിയിരിക്കുന്നത്.
മറ്റ് നാല് ഹോളിവുഡ് നടന്മാര്‍ക്ക് ഒപ്പമാണ് ചിയോ രാം ചരണിന്റെയും പേര് പറഞ്ഞത്. എന്റെ അഭിപ്രായത്തില്‍ ജെയിംസ് ബോണ്ട് ആകാന്‍ ഉചിതമായ ആളുകള്‍ ഇവരാണ് എന്നാണ് ചിയോ ട്വീറ്റ് ചെയ്തത്.
Damn! That escalated quickly. Everyone knows Idris from, well, everything, but to get inside my thinking, watch Sope in “Gangs Of London,” Matthew G in “The Offer”, Damson in “Snowfall” and Ram in “RRR”. They all deserve a shot at a Savile Row suit and a Walther PPK. https://t.co/8ZGV4UFd9P
— Cheo Hodari Coker (@cheo_coker) July 27, 2022
എന്തായാലും ചിയോയുടെ ട്വീറ്റ് ആരാധകര്‍ ഏറ്റെടുത്ത് കഴിഞ്ഞു. ഇന്ത്യന്‍ സിനിമക്കും താരങ്ങള്‍ക്കും ഇത്തരത്തില്‍ അന്തര്‍ദേശീയ അംഗീകാരങ്ങള്‍ ലഭിക്കുന്നതില്‍ സന്തോഷം പങ്കുവച്ചും നിരവധി പേര് എത്തുന്നുണ്ട്. ചിയോയുടെ ട്വീറ്റിന് നന്ദി അറിയിച്ചും നിരവധി പേരാണ് എത്തുന്നത്.
