ഹൈദരാബാദ്: മയക്കുമരുന്ന് കേസുമായി ബന്ധപ്പെട്ട് സിനിമാതാരങ്ങളായ റാണാ ദഗുബാട്ടിക്കും രാകുല്‍ പ്രീത് സിംഗിനും രവി തേജയ്ക്കും എന്‍.സി.ബിയുടെ നോട്ടീസ്. സെപ്റ്റംബര്‍ എട്ടിന് ഹാജരാകാനാണ് നാര്‍കോട്ടിക്‌സ് കണ്‍ട്രോള്‍ ബ്യൂറോ നോട്ടീസ് നല്‍കിയിരിക്കുന്നത്.
2017ല്‍ നടന്ന മയക്കുമരുന്ന് കേസുമായി ബന്ധപ്പെട്ട കൂടുതല്‍ വിവരങ്ങള്‍ ഈ അന്വേഷണത്തിലൂടെ പുറത്തുവരുമെന്നാണ് കരുതപ്പെടുന്നത്. അന്ന് പിടിച്ചെടുത്ത മയക്കുമരുന്ന് ഈ താരങ്ങള്‍ക്ക് വിതരണം ചെയ്യാനായിരുന്നുവെന്ന സൂചനകള്‍ പൊലീസിന് ലഭിച്ചിരുന്നെന്നും ഇതേ തുടര്‍ന്നാണ് നടപടിയെന്നുമാണ് റിപ്പോര്‍ട്ടുകള്‍.
ഇതേ കേസുമായി ബന്ധപ്പെട്ട് നടന്ന കള്ളപ്പണം വെളുപ്പിക്കലിന്റെ തെളിവുകള്‍ ലഭിച്ചതിന്റെ പശ്ചാത്തലത്തില്‍ എന്‍ഫോഴ്‌സ്‌മെന്റ് ഡയറക്ടറേറ്റ് അന്വേഷണം നടത്തുന്നുണ്ട്. ഈ കേസിലും മൂന്ന് താരങ്ങള്‍ക്കെതിരെ ആരോപണങ്ങള്‍ ഉയര്‍ന്നിട്ടുണ്ട്.
സംവിധായകന്‍ പുരി ജഗന്നാഥിനെ ഇ.ഡി ചോദ്യം ചെയ്തുവരികയാണ്. ചോദ്യം ചെയ്യലിനായി റാണാ ദഗുബാട്ടിയെയും രാകുല്‍ പ്രീതിനെയും രവി തേജയെയും ഇ.ഡി വിളിപ്പിച്ചിട്ടുണ്ട്. രവി തേജയുടെ ഡ്രൈവര്‍ ശ്രീനിവാസിനും ഇ.ഡി ഹാജരാകാന്‍ ആവശ്യപ്പെട്ട് നോട്ടീസ് അയച്ചിട്ടുണ്ട്.
