ഇന്ത്യയുടെ വിന്‍ഡീസ് പര്യടനത്തിലെ ടി-20 പരമ്പരയ്ക്ക് തുടക്കമാവുകയാണ്. ഏകദിന പരമ്പരയില്‍ വെസ്റ്റ് ഇന്‍ഡീസിനെ വൈറ്റ് വാഷ് ചെയ്താണ് ടീം ഇന്ത്യ ടി-20 പരമ്പരയ്ക്കിറങ്ങിപ്പുറപ്പെടുന്നത്.
ഏകദിന പരമ്പരയ്ക്ക് ശേഷം ടി-20 പരമ്പരയ്‌ക്കൊരുങ്ങുന്നതിന്റെ തിരക്കിലാണ് ഇന്ത്യന്‍ ടീം. ഇതിനായി താരങ്ങള്‍ പരിശീലനവും തുടങ്ങിയിട്ടുണ്ട്.
ഇതിനിടെ കഴിഞ്ഞ ദിവസം രാജസ്ഥാന്‍ റോയല്‍സ് പങ്കുവെച്ച ഒരു ചിത്രം ആരാധകര്‍ക്കിടയില്‍ തരംഗമായിരുന്നു. ‘സഞ്ജു ആന്‍ഡ് ഹിസ് സെക്‌സി തമിഴ് ഫ്രണ്ട്‌സ്’ എന്ന ക്യാപ്ഷനോടെയായിരുന്നു ദിനേഷ് കാര്‍ത്തിക്കിനും ആര്. അശ്വിനും ഒപ്പമുള്ള ചിത്രം രാജസ്ഥാന്‍ റോയല്‍സ് പങ്കുവെച്ചത്.
അതേസമയം, സീനിയര്‍ താരങ്ങള്‍ ടീമിലേക്ക് മടങ്ങിയെത്തിയതിന്റെ ആവേശത്തിലാണ് ഇന്ത്യന്‍ അരാധകര്‍. എന്നാല്‍ ടി-20 ഇന്ത്യയ്ക്ക് ഏകദിന പരമ്പര പോലെ ഒരിക്കലും എളുപ്പമാവാന്‍ സാധ്യതയില്ല. ആക്രമണോത്സുക ക്രിക്കറ്റിന്റെ പര്യായമായ ഒട്ടനവധി താരങ്ങള്‍ വിന്‍ഡീസിനൊപ്പം ചേര്‍ന്നിട്ടുണ്ട്.
നേരത്തെ പ്രഖ്യാപിച്ച ടി-20 സ്‌ക്വാഡില്‍ സഞ്ജു ഉള്‍പ്പെട്ടിരുന്നില്ല. ഏകദിന ടീമിലെ വിക്കറ്റ് കീപ്പര്‍ ബാറ്ററായാണ് സഞ്ജു പര്യടനത്തിനെത്തിയത്. ടി-20 ലോകകപ്പ് അടുത്ത് വരവെ ഈ സര്‍പ്രൈസ് നീക്കം സഞ്ജുവിന് ഗുണമാവുമെന്നുറപ്പാണ്.
ഇക്കാര്യത്തില്‍ ബി.സി.സി.ഐ ഔദ്യോഗിക പ്രഖ്യാപനം ഇതുവരെ നടത്തിയിട്ടില്ല. എന്നാല്‍ ബി.സി.സി.ഐ പുറത്തിറക്കിയ ഇന്ത്യന്‍ സ്‌ക്വാഡിന്റെ പട്ടികയില്‍ സഞ്ജുവിന്റെ പേരുണ്ട്.
എന്നാല്‍, സ്‌ക്വാഡില്‍ ഉള്‍പ്പെട്ടിട്ടുണ്ടെങ്കിലും സഞ്ജുവിന് എത്രത്തോളം ചാന്‍സ് ലഭിക്കുമെന്ന് കണ്ടറിയണം. വിക്കറ്റ് കീപ്പറായും ടോപ് ഓര്‍ഡര്‍ ബാറ്ററായും റിഷബ് പന്ത് ടീമിനൊപ്പമുള്ളപ്പോള്‍ സഞ്ജുവിന് ചാന്‍സ് ലഭിക്കാനുള്ള ചാന്‍സ് പരിമിതമാണ്.
എന്നിരുന്നാലും, ഏകദിനത്തിലെ പ്രകടനം കോച്ച് രാഹുല്‍ ദ്രാവിഡിന്റെയും സെലക്ടര്‍മാരുടെയും മനസില്‍ ഉണ്ടാവുമെന്നുറപ്പാണ്.
