കോണ്‍ഗ്രസ് വിടുന്നതിനെ കുറിച്ച് ഒരിക്കല്‍ പോലും സംസാരിച്ചിട്ടില്ല; പാര്‍ട്ടി വിപ്പ് നല്‍കിയാല്‍ നിയമസഭയില്‍ പങ്കെടുക്കുമെന്ന് വിമത എം.എല്‍.എ
ഡൂള്‍ന്യൂസ് ഡെസ്‌ക്
Saturday, 1st August 2020, 9:02 am
ജയ്പൂര്‍: പാര്‍ട്ടി വിപ്പ് നല്‍കിയാല്‍ തീര്‍ച്ചയായും ആഗസ്റ്റ് 14 ന് നടക്കുന്ന നിയമ സഭാ സമ്മേളനത്തില്‍ പങ്കെടുക്കാന്‍ തയ്യാറാണെന്ന് വ്യക്തമാക്കി സച്ചിന്‍ പക്ഷത്തെ വിമത എം.എല്‍.എ.ഉദയ്പൂരിലെ വല്ലഭനഗറില്‍ നിന്നുള്ള എം.എല്‍.എയും പൈലറ്റ് ക്യാമ്പിലെ 18 എം.എല്‍.എമാരില്‍ ഒരാളുമായ ഗജേന്ദ്ര സിംഗ് ശക്തിവതാണ് വിപ്പ് നല്‍കിയാല്‍ നിയമസഭയില്‍ പങ്കെടുക്കുമെന്ന കാര്യം വെളിപ്പെടുത്തിയത്.
തങ്ങള്‍ സച്ചിന്‍ പൈലറ്റിന്റെ കൂടെയുണ്ടാകുമെന്നും സച്ചിന്‍ എന്ത് തീരുമാനം എടുത്താലും അതിനൊപ്പം നില്‍ക്കുമെന്നും ഗജേന്ദ്ര സിംഗ് പറഞ്ഞു.
കോണ്‍ഗ്രസ് വിടുന്നതിനെ കുറിച്ച് ഒരിക്കല്‍ പോലും സംസാരിച്ചിട്ടില്ലെന്നും വിപ്പ് നല്‍കിയാല്‍ താന്‍ നിയമസഭാ സമ്മേളത്തില്‍ പങ്കെടുക്കുമെന്നും ഗജേന്ദ്ര സിംഗ് പറഞ്ഞു.
