'പിന്തുണ ഇവര്‍ക്ക്'; രാജസ്ഥാന്‍ വിഷയത്തില്‍ നിലപാട് തിരുത്തി ബി.ടി.പി; പൈലറ്റിന്റെ വിധി ഇന്ന്
ഡൂള്‍ന്യൂസ് ഡെസ്‌ക്
Friday, 17th July 2020, 8:54 am
ജയ്പൂര്‍: രാജസ്ഥാനില്‍ പ്രതിസന്ധി തുടരവെ, നിലപാട് തിരുത്തി ഭാരതീയ ട്രൈബല്‍ പാര്‍ട്ടി(ബി.ടി.പി). വിശ്വാസ വോട്ടെടുപ്പിന്റെ സാഹചര്യം വരുകയാണെങ്കില്‍ ഗെലോട്ട് പക്ഷത്തോടൊപ്പം നില്‍ക്കാനാണ് പാര്‍ട്ടി എം.എല്‍.എമാരോട് ആവശ്യപ്പെട്ടിരിക്കുന്നത്.
രാജസ്ഥാനില്‍ സര്‍ക്കാരിനെ പിന്തുണയ്ക്കാനാണ് തീരുമാനമെന്ന് ബി.ടി.പി ദേശീയാധ്യക്ഷന്‍ മഹേഷ് വാസവ പറഞ്ഞു.
അവിശ്വാസ പ്രമേയത്തിന്റെ ഘട്ടത്തില്‍ അശോക് ഗെലോട്ടിനെയോ സച്ചിന്‍ പൈലറ്റിനെയോ അനുകൂലിച്ച് വോട്ടുചെയ്യരുതെന്നായിരുന്നു പാര്‍ട്ടി നേരത്തെ എം.എല്‍.എമാര്‍ക്ക് നിര്‍ദ്ദേശം നല്‍കിയിരുന്നത്. തീരുമാനം മാറ്റിയതിന് പിന്നില്‍ കോണ്‍ഗ്രസിന്റെ ഇടപെടലുണ്ടോ എന്ന കാര്യത്തില്‍ വ്യക്തതയില്ല.
ബി.ടി.പിയ്ക്ക് രണ്ട് എം.എല്‍.എമാരാണുള്ളത്. രണ്ട് പേരും നിലവില്‍ ഗെലോട്ട് പക്ഷത്തെ എം.എല്‍.എമാര്‍ക്കൊപ്പം റിസോര്‍ട്ടിലാണുള്ളത്.
