'പണ്ടത്തെ തബല ഗോപി സുന്ദര്‍ അല്ലേ ചേട്ടന്‍'; ഗോപി സുന്ദറുമൊത്തുള്ള രസകരമായ അനുഭവം പങ്കുവെച്ച് രാജലക്ഷ്മി
എന്റര്‍ടെയിന്‍മെന്റ് ഡെസ്‌ക്
Sunday, 1st August 2021, 8:18 pm
കൊച്ചി: സംഗീത സംവിധായകന്‍ ഗോപി സുന്ദറുമൊത്തുള്ള രസകരമായ അനുഭവം പങ്കുവെയ്ക്കുകയാണ് ഗായിക രാജലക്ഷ്മി. ബിഹൈന്‍ഡ് വുഡ്‌സിന് നല്‍കിയ അഭിമുഖത്തിലായിരുന്നു രാജലക്ഷ്മി മനസ്സുതുറന്നത്.
‘ഗോപി ചേട്ടനെപ്പറ്റി പറയാനാണെങ്കില്‍ എനിക്ക് എന്റെ കുട്ടിക്കാലത്തിലേക്ക് പോകേണ്ടി വരും. കുട്ടിക്കാലത്ത് ഞാന്‍ മത്സരങ്ങളില്‍ പങ്കെടുക്കുമ്പോള്‍ സമ്മാനര്‍ഹരായവരുടെ ലിസ്റ്റില്‍ എന്റെ പേര് വായിക്കാറുണ്ട്.
ലളിത സംഗീതം ഒന്നാം സ്ഥാനം അല്ലെങ്കില്‍ വേറെന്തെങ്കിലും വിഭാഗത്തില്‍ സമ്മാനം എന്നിങ്ങനെ വിളിച്ച് പറയുമായിരുന്നു. അപ്പോള്‍ ആ വേദികളില്‍ സ്ഥിരം കേള്‍ക്കുന്നതാണ് തബല ഒന്നാം സ്ഥാനം ഗോപി സുന്ദര്‍ എന്ന്.
ഈ പേര് എല്ലാ സ്ഥലത്തും ഞാന്‍ കേട്ടിട്ടുണ്ട്. ചാര്‍ളിയില്‍ പാടുന്ന സമയത്ത് ഞാന്‍ ഗോപി ചേട്ടനുമായി നല്ല കൂട്ടായി. ഒരു ദിവസം ഞാന്‍ ചോദിച്ചു ചേട്ടന്റെ സ്ഥലം എവിടെയാണെന്ന്.
