കന്നഡ സൂപ്പര്‍ താരം രാജ് ബി ഷെട്ടി നായകനായ പാന്‍ ഇന്ത്യന്‍ ചിത്രം ’45 ‘ ന്റെ ഫസ്റ്റ് ലുക്ക് ടീസര്‍ പുറത്ത്. ദീപാവലിയോട് അനുബന്ധിച്ചാണ് ഫസ്റ്റ് ലുക്ക് ടീസര്‍ റിലീസ് ചെയ്തത്. ആനന്ദ് ഓഡിയോയുടെ യൂട്യൂബ് ചാനലില്‍ കന്നഡ, മലയാളം ഭാഷകളിലാണ് ടീസര്‍ റിലീസ് ചെയ്തിരിക്കുന്നത്. ഗരുഡ ഗമന വൃഷഭ വാഹന, ടോബി, സമീപകാല മലയാള ചിത്രങ്ങളായ ടര്‍ബോ എന്നിവയിലൂടെ ജനപ്രിയനായ രാജ് ബി ഷെട്ടിയുടെ ഏറ്റവും പുതിയ ചിത്രമാണ് ’45’.
കന്നഡ, ഹിന്ദി, തെലുങ്ക്, തമിഴ്, മലയാളം ഭാഷകളിലാണ് ’45’ റിലീസിനൊരുങ്ങുന്നത്. രാജ് ബി ഷെട്ടിക്കൊപ്പം കന്നഡ താരങ്ങളായ ശിവരാജ് കുമാര്‍, ഉപേന്ദ്ര എന്നിവരും പ്രധാന വേഷങ്ങള്‍ അവതരിപ്പിക്കുന്ന ചിത്രം സംവിധാനം ചെയ്തിരിക്കുന്നത് പ്രശസ്ത കന്നഡ സംഗീത സംവിധായകനായ അര്‍ജുന്‍ ജന്യയാണ്.
ദേശീയ പുരസ്‌കാരം നേടിയ സൂരജ് പ്രൊഡക്ഷന്‍സിന്റെ ബാനറില്‍ എം. രമേശ് റെഡ്ഡി നിര്‍മികുന്ന ചിത്രം ഒരു ദൃശ്യാത്ഭുതമായാണ് അണിയറപ്രവര്‍ത്തകര്‍ ഒരുക്കുന്നത്. ചിത്രത്തിന്റെ 40 ശതമാനത്തോളം ഹോളിവുഡ് വി.എഫ്.എക്‌സ് സ്റ്റുഡിയോയില്‍ ആണ് തയ്യാറാവുന്നത്. രാജ് ബി ഷെട്ടിയുടെ ലുക്കിനൊപ്പം ചിത്രത്തിന്റെ കഥാസന്ദര്‍ഭത്തെക്കുറിച്ചുള്ള ആദ്യ കാഴ്ചയാണ് ഫസ്റ്റ് ലുക്ക് ടീസര്‍ നല്‍കുന്നത്. ’45’ ന്റെ റിലീസ് തീയതി വരും ദിവസങ്ങളില്‍ പുറത്തുവിടും.
