നമുക്ക് വേണ്ടി ജയിലില്‍ കിടന്നയാള്‍; സവര്‍ക്കറെ ഷൂവര്‍ക്കര്‍ എന്നുവിളിക്കുന്നത് ചരിത്രത്തോടുള്ള അനീതിയെന്ന് രാഹുല്‍ ഈശ്വര്‍
ഡൂള്‍ന്യൂസ് ഡെസ്‌ക്
Thursday, 14th October 2021, 10:44 pm
കോഴിക്കോട്: സവര്‍ക്കറെ ഷൂവര്‍ക്കര്‍ എന്നുവിളിക്കുന്നത് ചരിത്രത്തോട് ചെയ്യുന്ന അനീതിയെന്ന് രാഹുല്‍ ഈശ്വര്‍. ‘വീര സവര്‍ക്കര്‍’ നാലായിരത്തോളം ദിവസം നമുക്കെല്ലാവര്‍ക്കും വേണ്ടി ജയിലില്‍ കിടന്ന വ്യക്തിയാണെന്നും അദ്ദേഹം പറഞ്ഞു.
സവര്‍ക്കറെ മഹാനാക്കുന്നത് എന്തിന്? ചരിത്രം മാറ്റി എഴുതുന്നോ ബി.ജെ.പി? എന്ന വിഷയത്തില്‍ മീഡിയാവണ്‍ ചാനലിലെ ‘സ്‌പെഷ്യല്‍ എഡീഷന്‍’ പ്രൊഗ്രാമില്‍ നടന്ന ചര്‍ച്ചയിലായിരുന്നു രാഹുല്‍ ഈശ്വറിന്റെ പ്രതികരണം.
എന്റെ വിശ്വാസത്തില്‍ ഗാന്ധി ഒരു ഫിലോസഫറാണ്. അദ്ദേഹത്തെ ആരോട് കൂട്ടിക്കെട്ടിയാലും നന്മ മാത്രമേ ഉണ്ടാവുകയൊള്ളു. 1944ല്‍ ഗോഡ്‌സെ ഗാന്ധിയെ കൊല്ലാനായി വന്നപ്പോള്‍ നമുക്ക് അഭിപ്രായ വ്യത്യാസമുണ്ടെങ്കില്‍ സംസാരിച്ച് തീര്‍ക്കാം എന്ന് പറഞ്ഞയാളാണ് ഗാന്ധി. ആ ഗാന്ധിയെ ആരുമായും കൂട്ടിച്ചേര്‍ക്കാമെന്നും രാഹുല്‍ ഈശ്വര്‍ പറഞ്ഞു.
