കൊച്ചി: ഹിന്ദുക്കളെയും മുസ്‌ലിങ്ങളെയും പരസ്പ്പരം തെറ്റിക്കാന്‍ ഹിന്ദു തീവ്രവാദികള്‍ ശ്രമിക്കാറുണ്ടെന്നും പശുവിനെ വെട്ടി അമ്പലത്തിലിട്ട് അത് മുസ്ലിങ്ങളുടെ തലയില്‍ വയ്ക്കുന്നുവെന്നും രാഹുല്‍ ഈശ്വര്‍. മുസ്ലിം സഹോദരന്മാര്‍ക്ക് ഒത്തു ചേരുന്നതിന് വെള്ളിയാഴ്ച ക്രിസ്ത്യന്‍ സഹോദരന്മാര്‍ക്ക് ഒത്തു ചേരുന്നതിന് ഞായറാഴ്ചയുമുള്ളതുപോലെ ഹിന്ദുക്കള്‍ക്ക് ഒരു ദിവസമില്ലാത്തതാണ് പ്രശനങ്ങള്‍ക്ക് കാരണമെന്നും അദ്ദേഹം പറഞ്ഞു
റിപ്പോര്‍ട്ടര്‍ ചാനലിലെ ന്യൂസ് നൈറ്റ് എന്ന പരിപാടിയിലാണ് അമ്പലങ്ങളില്‍ പശുവിനെ വെട്ടിയിടുന്നതുപോലുളള കാര്യങ്ങള്‍ ഹിന്ദു തീവ്രവാദികള്‍ ചെയ്യാറുണ്ടെന്ന് പറഞ്ഞത്. കേരളത്തില്‍ മതം മാറ്റം നടക്കുന്നുണ്ടോ എന്ന വിഷയത്തിലായിരുന്നു ചര്‍ച്ച.
“”പലപ്പോഴും ഞങ്ങളുടെ തീവ്ര സ്വരക്കാരും ഹിന്ദു തീവ്രവാദികളും ചെയ്യുന്നത് ഈ സ്പെയ്സിന് സ്വന്തമായി പശുവിനെ വെട്ടി അമ്പലത്തില്‍ കൊണ്ടുപോയി ഇട്ട് അത് മുസ്ലിങ്ങളുടെ തലയില്‍ കെട്ടിവയ്ക്കുകയും ഏതെങ്കിലും രീതിയില്‍ ടെന്‍ഷനുണ്ടാക്കി ഹിന്ദുക്കളെ സ്ട്രെസ്സിലാക്കുകയും അതുവഴി ഹിന്ദു ഐക്യമുണ്ടാക്കാന്‍ നോക്കിയെടുക്കുകയും ചെയ്യുന്നു””, എന്നും രാഹുല്‍ ഈശ്വര്‍ പറഞ്ഞു.
മഅ്ദനിയെ പോയി സന്ദര്‍ശിച്ചതിന് രാഹുലിനെതിരെ വധഭീഷണി ലഭിച്ചിരുന്നു. രാഹുല്‍ ഈശ്വര്‍ മഅ്ദനിയെ സന്ദര്‍ശിച്ചതിലൂടെ ഹൈന്ദവ വികാരം വ്രണപ്പെടുത്തിയെന്ന് ആരോപിച്ചാണ് രാഹുലിന് ഭീഷണി വന്നത്. ഹൈന്ദവസംഘടനകളുടെ പരിപാടിയില്‍ രാഹുല്‍ ഈശ്വര്‍ ഇനി പങ്കെടുത്താല്‍ കായികമായി നേരിടുമെന്നാണ ഭീഷണി. ഭീഷണിയെ തുടര്‍ന്ന് രാഹുല്‍ ഈശ്വര്‍ പൊലീസില്‍ പരാതി നല്‍കി.
കഴിഞ്ഞ ദിവസം ഹാദിയയുടെ വീട് സന്ദര്‍ശിച്ച ശേഷം ഹാദിയക്ക് പറയാനുള്ള കാര്യങ്ങള്‍ പുറത്ത് വിട്ടത് സംഘ പരിവാര്‍ സംഘടനകളെ ചൊടിപ്പിച്ചിരുന്നു. വീഡിയോ ചിത്രീകരിച്ചതിന് രാഹുലിനെതിരെ നിയമ നടപടികള്‍ സ്വീകരിക്കുമെന്ന് ഹാദിയയുടെ അച്ഛന്റെ വക്കീലും പറഞ്ഞിരുന്നു.
രാഹുലിനെതിരെ വ്യാപക പ്രചരണങ്ങളാണ് സോഷ്യല്‍ മീഡിയയില്‍ നടക്കുന്നത്. തനിക്കെതിരെ നടക്കുന്ന പ്രചരണങ്ങള്‍ രാഹുല്‍ തന്നെ ഫേസ്ബുക്കിലിട്ടിരുന്നു. രാഹുല്‍ ഈശ്വര്‍ ഐ.എസ്.ഐ.എസ് ചാരനാണെന്നും രാഹുല്‍ മുസ്ലിം മതത്തിലേക്ക് മതം മാറിയെന്നും പ്രചരണമുണ്ട്. മഅ്ദനിയെ സന്ദര്‍ശിച്ചതിന് ശേഷമാണ് രാഹുല്‍ ഹാദിയയുടെ വീട്ടില്‍ പോയതെന്ന് ആരോപണമുയര്‍ന്നിരുന്നു. എന്നാല്‍ താന്‍ ഹാദിയെ ആണ് ആദ്യം കണ്ടെതെന്നും മഅ്ദനിയെ പിന്നീടാണ് കണ്ടെതെന്നും രാഹുല്‍ ചര്‍ച്ചയില്‍ വിശദമാക്കി.
കടപ്പാട് റിപ്പോര്‍ട്ടര്‍ ടി.വി