മീരാ ജാസ്മിനും നരേനും കേന്ദ്ര കഥാപാത്രങ്ങളായെത്തുന്ന ‘ക്യൂൻ എലിസബത്ത്’ന്റെ ട്രെയ്ലർ പുറത്തുവിട്ടു. കുടുംബ പ്രേക്ഷകരെ ആകർഷിക്കുന്ന വിധത്തിൽ റൊമാൻറിക് കോമഡി എന്റർടൈയിനറായിട്ടാണ് ചിത്രം ഒരുക്കിയിരിക്കുന്നത്.
തന്റേടിയും അഹങ്കാരിയുമാണെന്ന് ലോകം വിലയിരുത്തുന്ന ക്വീൻ എലിസബത്തായി മീര ജാസ്മിൻ എത്തുമ്പോൾ എലിസബത്തിനെ പ്രണയിക്കുകയും ആരാധിക്കുകയും ചെയ്യുന്ന അലക്സായി നരേനും പ്രത്യക്ഷപ്പെടുന്നു. എം. പത്മകുമാറാണ് സംവിധായകൻ. അർജുൻ. ടി സത്യന്റെതാണ് തിരക്കഥ. ഡിസംബർ 29 മുതൽ ചിത്രം തിയേറ്ററുകളിലെത്തും.
വെള്ളം, അപ്പൻ, പടച്ചോനെ ഇങ്ങള് കാത്തോളി എന്നീ ചിത്രങ്ങളുടെ നിർമാതാവായ രഞ്ജിത്ത് മണമ്പ്രക്കാട്ട്, ബ്ലൂ മൗണ്ട് പ്രൊഡക്ഷൻസിന്റെ ബാനറിൽ എം പത്മകുമാർ, ശ്രീറാം മണമ്പ്രക്കാട്ട് എന്നിവരുമായ് ചേർന്നാണ് ചിത്രം നിർമിക്കുന്നത്.
കൊച്ചി, കുട്ടിക്കാനം, കോയമ്പത്തൂർ എന്നിവിടങ്ങളാണ് പ്രധാന ലൊക്കേഷനുകൾ. ജിത്തു ദാമോദറാണ് ഛായാഗ്രാഹകൻ. ഷിബു ചക്രവർത്തി, അൻവർ അലി, സന്തോഷ് വർമ്മ, ജോ പോൾ എന്നിവർ വരികൾ ഒരുക്കിയ ചിത്രത്തിലെ മനോഹര ഗാനങ്ങൾക്ക് രഞ്ജിൻ രാജാണ് സംഗീതം പകരുന്നത്. ചിത്രസംയോജനം അഖിലേഷ് മോഹൻ നിർവ്വഹിക്കും.
മീരാ ജാസ്മിനും നരേനും പുറമെ ശ്വേതാ മേനോൻ, രമേശ് പിഷാരടി, വി.കെ പ്രകാശ്, രഞ്ജി പണിക്കർ, ജോണി ആന്റണി, മല്ലികാ സുകുമാരൻ, ജൂഡ് ആന്തണി ജോസഫ്, ആര്യ ബഡായി ബംഗ്ലാവ്, ശ്രുതി രജനികാന്ത്, പേളി മാണി, സാനിയ ബാബു, നീനാ കുറുപ്പ്, മഞ്ജു പത്രോസ്, വിനീത് വിശ്വം, രഞ്ജി കാങ്കോൽ, ചിത്രാ നായർ തുടങ്ങി ഒട്ടനവധി താരങ്ങളാണ് ചിത്രത്തിൽ അണിനിരക്കുന്നത്.
അച്ചുവിന്റെ അമ്മ, മിന്നാമിന്നിക്കൂട്ടം, ഒരേ കടൽ തുടങ്ങിയ ചിത്രങ്ങൾക്ക് ശേഷം നരേനും മീരാ ജാസ്മിനും ഒരുമിക്കുന്ന ചിത്രമാണ് ക്യൂൻ എലിസബത്ത്.
