കെ.എം ബഷീര്‍ കൊല്ലപ്പെട്ട സമയത്തെ നിര്‍ണായക സി.സി.ടി.വി ദൃശ്യങ്ങള്‍ ശ്രീറാം വെങ്കിട്ടരാമന് നല്‍കാനാവില്ല; എതിര്‍പ്പുമായി പ്രോസിക്യൂഷന്‍
ഡൂള്‍ന്യൂസ് ഡെസ്‌ക്
Tuesday, 15th December 2020, 2:05 pm
തിരുവനന്തപുരം: മാധ്യമ പ്രവര്‍ത്തകന്‍ കെ.എം ബഷീറിനെ വാഹനമിടിച്ച് കൊലപ്പെടുത്തിയ കേസില്‍ തെളിവായി നല്‍കിയ സി.സി.ടി.വി ദൃശ്യങ്ങള്‍ പ്രതിക്ക് നല്‍കുന്നതിനെ എതിര്‍ത്ത് പ്രോസിക്യൂഷന്‍. കേസിന് തെളിവായി പൊലീസ് നല്‍കിയ രണ്ട് സി.ഡികള്‍ നല്‍കണമെന്നാണ് ഒന്നാം പ്രതിയായ ഐ.എ.എസ് ഉദ്യോഗസ്ഥന്‍ ശ്രീറാം വെങ്കിട്ടരാമന് ആവശ്യപ്പെട്ടത്. എന്നാല്‍ ഇത് നല്‍കാന്‍ സാധിക്കില്ലെന്നാണ് കോടതിയില്‍ പ്രോസിക്യൂഷന്‍ അറിയിച്ചത്.
രേഖകള്‍ ഹാജരാക്കാന്‍ പ്രോസിക്യൂഷന്‍ ഒന്നാം ക്ലാസ് മജിസ്‌ട്രേറ്റ് കോടതി നിര്‍ദേശിച്ചിരുന്നു. എന്നാല്‍ രേഖകള്‍ പ്രതിക്ക് നേരിട്ട് നല്‍കാനുള്ള നിയമസാധുതയില്ലെന്ന് ചൂണ്ടിക്കാട്ടിയാണ് പ്രോസിക്യൂഷന്‍ തെളിവ് നല്‍കുന്നതിനെ എതിര്‍ത്തത്.
