കൊച്ചി: മമ്മൂട്ടിയുടെ പേരന്‍പിലെ അഭിനയത്തെ വാനോളം പുകഴ്ത്തി സിനിമാ രംഗത്തെ പ്രമുഖര്‍. സമാനതകളില്ലാത്ത് അഭിനയമാണ് മമ്മൂട്ടി കാഴ്ചവെച്ചതെന്നും സൂക്ഷ്മാഭിനയം ഇത് പോലെ കൈകാര്യം ചെയ്യുന്ന മറ്റൊരു നടനില്ലെന്നും സിനിമാ രംഗത്തെ പ്രമുഖര്‍ പറഞ്ഞു.
എസ്.എന്‍.സ്വാമി ജോഷി, സിബി മലയില്‍,കമല്‍, രഞ്ജിത്ത്, സത്യന്‍ അന്തിക്കാട്, ബി. ഉണ്ണികൃഷ്ണന്‍, രണ്‍ജി പണിക്കര്‍, ലിജോജോസ് പെല്ലിശ്ശേരി, ഹനീഫ് അദേനി, നാദിര്‍ഷ, രമേശ് പിഷാരടി, രഞ്ജിത്ത് ശങ്കര്‍, ബാലചന്ദ്രന്‍ ചുള്ളിക്കാട്, വിജയലക്ഷ്മി, ആന്റോ ജോസഫ്, നിവിന്‍ പോളി, അനുസിത്താര, അനുശ്രീ, നിമിഷ സജയന്‍, സംയുക്ത വര്‍മ്മ തുടങ്ങി നിരവധി പേരാണ് പേരന്‍പിനെ പുകഴ്ത്തി രംഗത്തെത്തിയത്.
കഴിഞ്ഞ ദിവസം ഫെബ്രുവരി ഒന്നിനുള്ള പേരന്‍പിന്റെ റിലീസിനോടനുബന്ധിച്ച് നടന്ന പ്രീമിയര്‍ ഷോക്ക് ശേഷമായിരുന്നു ഇവരുടെ പ്രതികരണം. ചിത്രത്തിന്റെ അണിയറ പ്രവര്‍ത്തകരും പരിപാടിയില്‍ പങ്കെടുത്തിരുന്നു. അടുത്ത മാസം ഒന്നാം തിയ്യതിയാണ് ചിത്രം റിലീസ് ചെയ്യുന്നത്. മമ്മൂട്ടിക്ക് പുറമേ സാധന, അഞ്ജലി, അഞ്ജലി അമീര്‍ തുടങ്ങിയവരാണ് പ്രധാനവേഷത്തില്‍ എത്തുന്നത്.
ചില പ്രതികരണങ്ങള്‍
ഒരു സിനിമ കണ്ട് അതിശയിച്ച് പോയിരിക്കുകയാണ് ഞാന്‍, മലയാളത്തിലെ എക്കാലത്തെയും പുതുമുഖ നടനാണ് മമ്മൂക്ക – സത്യന്‍ അന്തിക്കാട്
ഇത് പോലെ സൂക്ഷ്മാംശങ്ങള്‍ അഭിനയിക്കാന്‍ കഴിയുന്ന ഇന്ത്യയില്‍ ഒരേ ഒരു നടനെയുള്ളു അത് മമ്മൂക്കയാണ് അത് കൊണ്ടാണ് ഇന്നും അന്യ ഭാഷ സംവിധായകര്‍ മമ്മൂട്ടിയെ തേടി വരുന്നത്, അത് കൊണ്ടാണ് ജബ്ബാര്‍ പട്ടേല്‍ അംബേദ്ക്കര്‍ ആയി മമ്മൂക്കയെ തിരഞ്ഞെടുത്തത് ,പേരന്‍പിലൂടെ ദേശീയ അവാര്‍ഡ് മലയാളത്തില്‍ വീണ്ടും എത്തും – കമല്‍
മമ്മൂക്കയുടെ കണ്ഡം ഇടറിയാല്‍ മമ്മൂക്കയുടെ കണ്ണ് നിറഞ്ഞാല്‍ നമ്മളുടെ കണ്ഡം ഇടറും നമ്മളും കരയും – ലിജോ ജോസ് പെല്ലിശ്ശേരി
പണ്ട് തനിയാവര്‍ത്തനം കണ്ട് ഞാന്‍ കരഞ്ഞിട്ടുണ്ട് അന്ന് മുതല്‍ പ്രതിഞ്ജ എടുത്തതാണ് ഇനി ഞാന്‍ ഒരിക്കലും കരയില്ല എന്ന് അല്ലെങ്കില്‍ ഒരു നടനും എന്നെ കരയിപ്പിക്കാന്‍ കഴിയില്ല എന്ന്. ഈ ദിവസം വരെ ഞാന്‍ ജയിച്ചു പക്ഷേ ഇന്ന് ഞാന്‍ കരഞ്ഞു ഞാന്‍ വീണ്ടും തോറ്റു എന്നെ വീണ്ടും കരയിപ്പിച്ചത് മമ്മൂക്കയാണ് എന്നെ വീണ്ടും മമ്മൂക്ക തോല്‍പ്പിച്ചു – എസ്.എന്‍. സ്വാമി
അഭിനയ സമൃദ്ധമാണ് മമ്മൂട്ടി .എത്ര കോരിയെടുത്താലും തീരാത്ത അക്ഷയ ഖനിയാണ് മമ്മൂക്ക – രഞ്ജി പണിക്കര്‍
കാലം കഴിയുംതോറും വീഞ്ഞിന് വീര്യം കൂടുമെന്ന് പറയുന്നത് പോലെ കാലം കഴിയും തോറും അഭിനയിച്ച് വിസ്മയിപ്പിക്കുകയാണ് മമ്മൂട്ടി – ബി.ഉണ്ണികൃഷ്ണന്‍
എന്നെ വല്ലാതെ ഉലച്ചു കഴിഞ്ഞു പേരന്‍പിലെ മമ്മൂക്ക – സിബി മലയില്‍
ലോകം കണ്ട മികച്ച നടന്‍മാരില്‍ ഒരാളാണ് മമ്മൂക്ക ഓരോ പ്രേക്ഷകന്റെയും ഹൃദയത്തെ ശുദ്ധീകരിക്കാന്‍ കഴിവുള്ള സിനിമയാണ് പേരന്‍പ് – ബാലചന്ദ്രന്‍ ചുള്ളിക്കാട്