ആലപ്പുഴ: മുന്‍മന്ത്രി തോമസ് ചാണ്ടിയുടെ മരണത്തോടെ ഉപതെരഞ്ഞെടുപ്പ് നടക്കാനിരിക്കുന്ന കുട്ടനാട്ടില്‍ സീറ്റിനായി കേരളാ കോണ്‍ഗ്രസ് എമ്മില്‍ തര്‍ക്കം തുടങ്ങി. ജോസഫ്, ജോസ് പക്ഷങ്ങള്‍ പരസ്യമായിത്തന്നെ തമ്മിലടി വീണ്ടും തുടങ്ങിയെന്നാണ് റിപ്പോര്‍ട്ടുകള്‍. ഇക്കുറി കുട്ടനാട് സീറ്റിലെ സ്ഥാനാര്‍ഥിയെ ജോസ് കെ. മാണി പ്രഖ്യാപിക്കുമെന്നും സീറ്റ് ആരുടെയും കുത്തകയല്ലെന്നും ജോസ് പക്ഷം തുറന്നടിച്ചുകഴിഞ്ഞു.
കഴിഞ്ഞതവണ മത്സരിച്ച ജേക്കബ് എബ്രഹാമിനെത്തന്നെ സ്ഥാനാര്‍ഥിയാക്കാനാണ് ജോസഫ് പക്ഷം ആലോചിക്കുന്നത്. ഇക്കാര്യം യു.ഡി.എഫില്‍ അവതരിപ്പിക്കാനുള്ള നീക്കത്തിലാണ് അവര്‍.
എന്നാല്‍ സ്വയം പ്രഖ്യാപിത സ്ഥാനാര്‍ഥിയായി ഇതോടകം തന്നെ മണ്ഡലത്തിലിറങ്ങിയിട്ടുള്ള ജേക്കബിനെ അംഗീകരിക്കില്ലെന്നാണ് ജോസ് പക്ഷം പറയുന്നത്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
കഴിഞ്ഞ നിയമസഭാ തെരഞ്ഞെടുപ്പില്‍ ഡോ. കെ.സി ജോസഫ് ജനാധിപത്യ കേരളാ കോണ്‍ഗ്രസിലേക്കു കൂറുമാറിയതോടെയാണ് സീറ്റ് ജോസഫ് വിഭാഗത്തിനു നല്‍കിയത്. എന്നാല്‍ ഇപ്പോള്‍ സാഹചര്യം അതല്ലെന്നും ഉന്നതാധികാര സമിതി തീരുമാനമെടുക്കുമെന്നുമാണ് ജോസ് പക്ഷത്തിന്റെ നിലപാട്.
