അറബ് പ്രമുഖര്‍ പാകിസ്ഥാനിലെ ഹൗബാറ ബസ്റ്റാര്‍ഡുകളെ വേട്ടയാടുന്ന ദൃശ്യം; മാധ്യമപ്രവര്‍ത്തകന്‍ കൊല്ലപ്പെട്ട സംഭവത്തില്‍ അന്വേഷണം ആവശ്യപ്പെട്ട് അന്താരാഷ്ട്ര മീഡിയ വാച്ച്‌ഡോഗ്
ഡൂള്‍ന്യൂസ് ഡെസ്‌ക്
Monday, 8th November 2021, 3:31 pm
കറാച്ചി: പാകിസ്ഥാനില്‍ വീണ്ടും വിവാദമായി ഹൗബറ ബസ്റ്റാര്‍ഡുകളുടെ വേട്ട.
വംശനാശഭീഷണി നേരിടുന്ന ഹൗബാറ ബസ്റ്റാര്‍ഡുകളെ പാകിസ്ഥാനിലെ അറബ് പ്രമുഖര്‍ നിയമവിരുദ്ധമായി വേട്ടയാടുന്നതിനെക്കുറിച്ചുള്ള ക്ലിപ്പുകള്‍ പോസ്റ്റ് ചെയ്ത അമേച്വര്‍ വീഡിയോ റിപ്പോര്‍ട്ടറെ കൊലപ്പെടുത്തിയതിന് പിന്നാലെയാണ് സംഭവം വീണ്ടും വിവാദമായത്.
കൊലപാതകത്തില്‍ സ്വതന്ത്ര അന്വേഷണം ആവശ്യപ്പെട്ട് അന്താരാഷ്ട്ര മീഡിയ വാച്ച്‌ഡോഗ് രംഗത്തെത്തി.
കറാച്ചിയിലെ മാലിര്‍ ഏരിയയില്‍ നിന്നുള്ള നസിം ജോഖിയോയാണ് ബുധനാഴ്ച കൊല്ലപ്പെട്ടത്. പാകിസ്ഥാനിലെ സമ്പന്നരായ അറബികള്‍ അനധികൃത വേട്ടയാടല്‍ നടത്തിയ വീഡിയോ പോസ്റ്റ് ചെയ്തതിന് പിന്നാലെ തനിക്ക് ഭീഷണിയുണ്ടെന്ന് അദ്ദേഹം പറഞ്ഞിരുന്നു.
