തന്നെ പ്രിയ വാര്യരാക്കിയ എല്ലാ ഘടകങ്ങളും ലൈവ് എന്ന സിനിമക്ക് വേണ്ടി മാറ്റിയിട്ടുണ്ടെന്ന് പ്രിയ വാര്യര്‍. വി.കെ. പ്രകാശ് സംവിധാനം ചെയ്യുന്ന ലൈവ് എന്ന സിനിമയുടെ പ്രമോഷന്റെ ഭാഗമായി ബിഹൈന്‍ഡ് വുഡ്‌സ് ഐസിന് നല്‍കിയ അഭിമുഖത്തിലാണ് പ്രിയ വാര്യര്‍ ഈ സിനിമക്ക് വേണ്ടി ചെയ്തിട്ടുള്ള മാറ്റങ്ങളെ കുറിച്ച് സംസാരിച്ചത്.
ഞാന്‍ ഇതുവരെയും ചെയ്യാത്ത തരത്തിലുള്ള ഒരു കഥാപാത്രമാണ് ഈ സിനിമയില്‍ ചെയ്തിട്ടുള്ളത്. ടീസറൊക്കെ കണ്ടാല്‍ മനസിലാകും, വളരെ പാവപ്പെട്ട, ഒരു നാടന്‍ ലുക്കുള്ള, വളരെ ചെറിയ ഒരു ലോകത്ത് ജീവിക്കുന്ന ഒരു പെണ്‍കുട്ടിയുടെ കഥാപാത്രമാണ് ഈ സിനിമയില്‍ ഞാന്‍ ചെയ്തത്. മെഡിസിന്‍ പഠിക്കണം, ഡോക്ടറാകണം എന്ന് മാത്രം ആഗ്രഹമുള്ള വളരെ നിഷ്‌കളങ്കയായിട്ടുള്ള ഒരു പെണ്‍കുട്ടി.
എന്നെ സംബന്ധിച്ച് തീര്‍ത്തും വ്യത്യസ്തമായ അനുഭവമാണ് ഈ സിനിമ. കാരണം ഞാന്‍ ഇതുവരെ അങ്ങനെയൊരു കഥാപാത്രം ചെയ്തിട്ടില്ല. പ്രേക്ഷകര്‍ ഇതുവരെ എന്നെ അങ്ങനെയൊരു വേഷത്തില്‍ കണ്ടിട്ടുമില്ല. നാടന്‍ ലുക്ക് എനിക്ക് ചേരുമോ എന്നുള്ളൊരു ചോദ്യം എല്ലാവര്‍ക്കുമുണ്ടാകും. പക്ഷെ വി.കെ. പ്രകാശിന് ആ സംശയമുണ്ടായിരുന്നില്ല. അന്ധമായി അദ്ദേഹത്തെ വിശ്വസിച്ച് കൊണ്ടാണ് ഞാന്‍ ഈ സിനിമക്ക് സമ്മതം പറഞ്ഞത്.
തുടക്കത്തില്‍ തന്നെ അദ്ദേഹം പറഞ്ഞിരുന്നു, മേക്കപ്പ് ഇടില്ല, കമ്മലുകള്‍ അഴിച്ചുവെക്കണം, ആ തരത്തില്‍ എന്നെ പ്രിയയാക്കി മാറ്റിയ എല്ലാ ഘടകങ്ങളും ഒഴിവാക്കണമെന്ന്. അത് കേട്ടപ്പോള്‍ ഞാന്‍ വളരെ എക്‌സൈറ്റടായിരുന്നു. കാരണം ഓരോ സിനിമ ചെയ്യുമ്പോഴും എന്നില്‍ നിന്നും കഥാപാത്രത്തിനെ വ്യത്യസ്തമാക്കാന്‍ ശ്രമിക്കാറുണ്ട്. ആ തരത്തില്‍ എന്തെങ്കിലുമൊരു ചെറിയ മാറ്റമെങ്കിലും വരുത്താന്‍ ഞാന്‍ ശ്രമിക്കാറുണ്ട്. ഈ സിനിമയില്‍ ഒരു തുള്ളിപോലും മേക്കപ്പ് ഇട്ടിട്ടില്ല. അതു കൊണ്ട് തന്നെ ലൈവ് എന്ന സിനിമ കാണാന്‍ ഞാന്‍ വളരെ ആകാംക്ഷയോടെ കാത്തിരിക്കുകയാണ്.
content highlights: Priya Warrier talks about the changes that have been implemented for the character