തമിഴ് സിനിമാതാരങ്ങളായ ജ്യോതികയും സൂര്യയും തമ്മിലുള്ള തന്റെ സൗഹൃദത്തെ കുറിച്ച് പറയുകയാണ് നടന്‍ പൃഥ്വിരാജ് സുകുമാരന്‍. തമിഴ് സിനിമയില്‍ നിന്നുള്ള തന്റെ ഏറ്റവും ക്ലോസായ ആളുകളാണ് അവരെന്നാണ് അദ്ദേഹം പറയുന്നത്.

മൊഴി സിനിമയിലൂടെയാണ് ജ്യോതികയുമായി സൗഹൃദം ആരംഭിക്കുന്നതെന്നും ജ്യോതിക വഴിയാണ് സൂര്യയുമായുള്ള ബന്ധം തുടങ്ങിയതെന്നുമാണ് പൃഥ്വിരാജ് പറയുന്നത്.

മൊഴിയുടെ സമയത്ത് ഇരുവരുടെയും കൂടെ താന്‍ ചെന്നൈയിലെ ഒരു തിയേറ്ററില്‍ പോയി സിനിമ കണ്ടത് ഇന്നും ഓര്‍മയുണ്ടെന്നും അദ്ദേഹം പറയുന്നു. അന്നൊക്കെ തങ്ങള്‍ ഒരുമിച്ച് ഒരുപാട് സമയം ചെലവഴിച്ചിരുന്നുവെന്നും ജ്യോതികയും തന്റെ പങ്കാളിയായ സുപ്രിയയും ഇപ്പോള്‍ നല്ല സുഹൃത്തുക്കളാണെന്നും പൃഥ്വി കൂട്ടിച്ചേര്‍ത്തു.

‘തമിഴ് സിനിമയില്‍ നിന്നുള്ള എന്റെ ഏറ്റവും ക്ലോസായ ആളുകളാണ് ജ്യോതികയും സൂര്യയും. ഞങ്ങള്‍ തമ്മിലുള്ള ബന്ധം ആരംഭിക്കുന്നത് മൊഴി എന്ന സിനിമയിലൂടെയാണ്. ജ്യോതിക വഴിയാണ് സൂര്യയുമായി ബന്ധം ആരംഭിക്കുന്നത്.

എന്റെ ഓര്‍മ ശരിയാണെങ്കില്‍ മൊഴി സിനിമയുടെ സമയത്തായിരുന്നു അവരുടെ വിവാഹം കഴിഞ്ഞിരുന്നത്. അതോ വിവാഹം തീരുമാനിച്ച സമയമായിരുന്നോയെന്ന് ഓര്‍മയില്ല.

അന്ന് സൂര്യയും ജ്യോതികയും ഞാനും ഒരുമിച്ച് അവിടെയുള്ള ഒരു തിയേറ്ററില്‍ പോയി സിനിമ കണ്ടത് എനിക്ക് ഇന്നും ഓര്‍മയുണ്ട്. അവര്‍ ചെന്നൈയിലെ പുതിയ അപ്പാര്‍ട്‌മെന്റിലേക്ക് മാറിയ സമയമായിരുന്നു അത്. ഞാന്‍ അവരുടെ ഹൗസ് വാമിങ്ങിന് ഉണ്ടായിരുന്നു.

അന്നൊക്കെ ഞങ്ങള്‍ ഒരുമിച്ച് ഒരുപാട് സമയം ചെലവഴിച്ചിരുന്നു. ജ്യോതികയും സുപ്രിയയും ഇപ്പോള്‍ നല്ല സുഹൃത്തുക്കളാണ്. അവര്‍ ഞങ്ങളെ അപ്പാര്‍ട്‌മെന്റിലേക്ക് ഡിന്നറിന് ക്ഷണിച്ചിരുന്നു.

വളരെ വണ്ടര്‍ഫുളായിട്ടുള്ള ആളുകളാണ് സൂര്യയും ജ്യോതികയും. ഞാന്‍ ഇതിന് മുമ്പും പറഞ്ഞ കാര്യമാണ്. അത്ര മികച്ച ആളുകളാണ് അവര്‍. അവരോട് സംസാരിക്കുമ്പോള്‍ അവര്‍ അത്രയും വലിയ സ്റ്റാറുകളാണെന്ന് നമ്മള്‍ മറക്കും,’ പൃഥ്വിരാജ് സുകുമാരന്‍ പറഞ്ഞു.

Content Highlight: Prithviraj Sukumaran Talks About His Relationship With Jyothika And Suriya