പ്രേക്ഷകര്‍ ഏറെ കാത്തിരിക്കുന്ന മോഹന്‍ലാല്‍ പൃഥ്വിരാജ് കൂട്ടുകെട്ടിലൊരുങ്ങുന്ന ചിത്രമാണ് ബ്രോ ഡാഡി. മോഹന്‍ ലാലിനെ നായകനാക്കി പൃഥ്വിരാജ് ഒരുക്കുന്ന രണ്ടാമത്തെ ചിത്രം കൂടിയാണ് ബ്രോ ഡാഡി.
ലൂസിഫറിന് ശേഷം എമ്പുരാന് എന്ന ചിത്രമാണ് പൃഥ്വിരാജ് സംവിധാനം ചെയ്യാനിരുന്നിരുന്നത്. എന്നാല്‍ എമ്പുരാന് മുമ്പ് ബ്രോ ഡാഡി ചെയ്യാന്‍ തീരുമാനിക്കുകയായിരുന്നു.
ബ്രോ ഡാഡി ഒരു ചെറിയ സിനിമയാണെന്ന് നേരത്തേ പൃഥ്വിരാജ് പറഞ്ഞിരുന്നു. ലൂസിഫറില്‍ നിന്നും വ്യത്യസ്തമായ ചിത്രമാണ് ബ്രോ ഡാഡിയെന്നും പൃഥ്വിരാജ് പറഞ്ഞിരുന്നു.
ബ്രോ ഡാഡി ഒരു ഫാമിലി ഡ്രാമയാണെന്നാണ് പൃഥ്വിരാജ് നേരത്തെ അറിയിച്ചിരുന്നത്.
സിനിമയുമായി ബന്ധപ്പെട്ട് പങ്കുവെക്കാറുള്ള എല്ലാ പോസ്റ്റുകളും പ്രേക്ഷകര്‍ ഇരുകൈയ്യും നീട്ടി സ്വീകരിക്കാറുണ്ടായിരുന്നു. ഇപ്പോഴിതാ പൃഥ്വിരാജ് ഇന്‍സ്റ്റഗ്രാമില്‍ പങ്കുവെച്ച പോസ്റ്റാണ് പ്രേക്ഷകര്‍ ഏറ്റെടുത്തിരിക്കുന്നത്.
റോഡില്‍ കാര്‍ നിര്‍ത്തിയിട്ട് എന്തോ കാര്യമായി എഴുതുന്ന ചിത്രമാണ് പൃഥ്വി പങ്കുവെച്ചിരിക്കുന്നത്. ചിത്രത്തിന് രസകരമായ അടികുറിപ്പും താരം നല്‍കിയിട്ടുണ്ട്.
‘റോഡിന് നടുവില്‍ വെച്ച് പ്രചോദനം ലഭിക്കുമ്പോള്‍ നിങ്ങള്‍ വണ്ടി നിര്‍ത്തും, എഴുതും. ബ്രോ ഡാഡി ദിനങ്ങള്‍,’ എന്നാണ് പൃഥ്വിരാജ് ഇന്‍സ്റ്റഗ്രാമില്‍ കുറിച്ചത്.
ചിത്രം ഒ.ടി.ടിയിലാരിക്കും റിലീസ് ചെയ്യുക എന്ന് നേരത്തെ വാര്‍ത്തകള്‍ വന്നിരുന്നു.
മോഹന്‍ലാലിന് പുറമേ മീന, ലാലു അലക്‌സ്, മുരളി ഗോപി, കനിഹ, സൗബിന്‍ ഷാഹിര്‍ തുടങ്ങിയ വന്‍ താരനിരയും ചിത്രത്തില്‍ അണിനിരക്കുന്നുണ്ട്.
ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മിക്കുന്നത്. ശ്രീജിത്ത് എനും ബിബിന്‍ ജോര്‍ജും ചേര്‍ന്നാണ് ചിത്രത്തിന്റെ തിരകഥയൊരുക്കിയിരിക്കുന്നത്. ദീപക് ദേവാണ് സംഗീത സംവിധാനം നിര്‍വഹിക്കുന്നത്.
