വൈശാഖ് ഒരുക്കിയ മമ്മൂട്ടി ചിത്രം മധുര രാജയിലെ ‘മോഹ മുന്തിരി’ എന്ന പാട്ട് വലിയ രീതിയിൽ ശ്രദ്ധ നേടിയ ഒന്നായിരുന്നു. ഇന്ത്യ മുഴുവൻ ഏറെ ആരാധകരുള്ള നടി സണ്ണി ലിയോൺ ആദ്യമായി മലയാളത്തിൽ പ്രത്യക്ഷപ്പെട്ട സിനിമയായിരുന്നു അത്.

പാട്ട് സീനിൽ സണ്ണി ലിയോണിനോടൊപ്പം അഭിനയിച്ച നടനാണ് പ്രശാന്ത് അലക്സാണ്ടർ. കാലങ്ങളായി സിനിമയിൽ ഉണ്ടെങ്കിലും പ്രേക്ഷകർ വലിയ രീതിയിൽ പ്രശാന്തിനെ രജിസ്റ്റർ ചെയ്ത സിനിമ കൂടിയായിരുന്നു മധുര രാജ.

ആദ്യമായി സണ്ണി ലിയോണിനെ കണ്ട അനുഭവം പങ്കുവെക്കുകയാണ് അദ്ദേഹം. സണ്ണി ലിയോണിനെ കൂടുതൽ അടുത്തറിഞ്ഞപ്പോഴാണ് അവരെ കുറിച്ച് കേട്ടതിൽ നിന്നെല്ലാം ഒരുപാട് വ്യത്യസ്തയാണെന്ന് തനിക്ക് മനസിലാക്കാൻ കഴിഞ്ഞതെന്ന് പറയുകയാണ് പ്രശാന്ത്. കാൻചാനൽ മീഡിയയോട് സംസാരിക്കുകയായിരുന്നു താരം.

‘മധുര രാജയെ കുറിച്ച് ഞാൻ കേൾക്കുമ്പോൾ തൊട്ട് ആ ചിത്രത്തിൽ സണ്ണി ലിയോൺ വരുന്നുണ്ടെന്ന് എനിക്ക് അറിയാമായിരുന്നു. സ്ക്രിപ്റ്റിന്റെ ചർച്ച നടക്കുമ്പോൾ തന്നെ ചിത്രത്തിലേക്ക് സണ്ണി ലിയോണിനെ കൊണ്ട് വരണം എന്ന് പറയുന്നുണ്ടായിരുന്നു. സിനിമയുടെ കോസ്റ്റ് ആലോചിച്ച് ചിലപ്പോൾ മറ്റൊരാളെ ആലോചിച്ചിട്ടുണ്ടാവാം. പക്ഷെ പിന്നീട് വീണ്ടും തിരിച്ച് അവരിലേക്ക് തന്നെ വന്നു.

ആദ്യമായി അവരെ കാണുന്നതിനേക്കാൾ എനിക്ക് അത്രയും വലിയൊരു സ്പേസ് കിട്ടുന്ന ത്രില്ലിൽ ആയിരുന്നു ഞാൻ. പത്ത് പതിനാറ് കൊല്ലം സിനിമയുടെ പിറകെ നടന്ന്, നമ്മൾ സ്‌ക്രീനിൽ കാണാൻ ആഗ്രഹിച്ച ഒരു വേഷം കിട്ടിയത് മധുര രാജയിൽ ആയിരുന്നു.

സണ്ണി ലിയോൺ വരുന്നു എന്ന വാർത്ത വലിയ രീതിയിൽ പ്രചരിക്കുന്നുണ്ടായിരുന്നു. എന്റെ ചിന്ത മുഴുവൻ ഞാൻ അതെങ്ങനെ ചെയ്തെടുക്കും എന്നായിരുന്നു. എനിക്കവിടെ ചെല്ലുമ്പോൾ സണ്ണി ലിയോൺ എന്നത് വലിയൊരു സംഭവമായി തോന്നിയിട്ടേയില്ല. ഞാൻ എങ്ങനെ ചെയ്യും എന്നായിരുന്നു എന്റെ മനസ് മുഴുവൻ. സണ്ണി ലിയോൺ എന്ന ആകാംക്ഷയില്ല. പുറത്ത് നിന്ന് സണ്ണി ലിയോണിനെ കുറിച്ച് ഒരുപാട് കേട്ടത് കൊണ്ട് അവരുടെ കൂടെ ഒരു ഫോട്ടോ എടുക്കണം എന്നുണ്ടായിരുന്നു. പക്ഷെ ഒരാളുടെ പോലും ഫോൺ ഉള്ളിലേക്ക് കടത്തി വിട്ടില്ല. പിന്നെ പാട്ട് കഴിഞ്ഞിട്ടാണ് ഫോട്ടോ എടുത്തത്.

എന്റെയൊക്കെ യൗവനകാലത്ത് ഷക്കീല മറിയ ഒക്കെയല്ലേ ഉള്ളത്. സണ്ണി ലിയോൺ യുഗത്തിലേക്ക് എത്തിയപ്പോഴേക്കും നമ്മുടെ ഫോക്കസ് വേറേ പലതിലും ആയല്ലോ. അതുകൊണ്ട് തന്നെ എനിക്ക് അവരെ പറ്റി അത്ര കാര്യമായി അറിയില്ലായിരുന്നു.

പുള്ളിക്കാരിയെ കുറിച്ച് സെർച്ച്‌ ചെയ്തപ്പോൾ കാണാൻ പറ്റിയത് അധികവും ഒരുപാട് ഇന്റർവ്യൂസ് ആയിരുന്നു. അതുപോലെ അവരെ കുറിച്ചുള്ള ഡോക്യൂമെന്ററീസ് കാണാൻ പറ്റി. അതെല്ലാം കണ്ടപ്പോഴാണ് നമ്മൾ കേട്ടിട്ടുള്ള സണ്ണി ലിയോൺ അല്ല യഥാർത്ഥത്തിൽ ഉള്ളതെന്ന് അറിയുന്നത്. അങ്ങനെയാണ് ഒരു തിരിച്ചറിവ് എനിക്ക് ഉണ്ടാവുന്നത്. അവർ ചെയ്യുന്നത് അവരുടെ പ്രൊഫഷനാണ്.

അവർ ഒരു നടിയാണ്. നമ്മൾ സിനിമയിൽ റേപ്പ് ചെയ്യും കൊലപാതകം ചെയ്യും. അങ്ങനെ അഭിനയിക്കുമെന്ന് കരുതി നമ്മൾ അതല്ലല്ലോ. അങ്ങനെ അവരോട് ശരിക്കും നല്ല റെസ്‌പെക്ട് തോന്നി. അത് ഇരട്ടിച്ചത് ലൊക്കേഷനിലെ അവരുടെ പെരുമാറ്റം കണ്ടിട്ടായിരുന്നു. വളരെ ഡൗൺ ടു എർത്തായ ഒരാളാണ് സണ്ണി ലിയോൺ,’ പ്രശാന്ത് പറയുന്നു.

Content Highlight: Prasanth Alexander Talk About Sunny Leone