കോഴിക്കോട്: ആരാധകര്‍ ആവേശപൂര്‍വ്വം കാത്തിരിക്കുന്ന പ്രണവ് മോഹന്‍ലാല്‍ നായകനാകുന്ന ആദിയുടെ രണ്ടാമത്തെ പോസ്റ്റര്‍ പുറത്ത് വിട്ടു. സംവിധായകന്‍ ജീത്തു ജോസഫ് ഫേസ്ബുക്ക് വഴിയാണ് പോസ്റ്റര്‍ പുറത്ത് വിട്ടത്. അടുത്തവര്‍ഷം ജനുവരി ഇരുപത്തിയാറിന് റിലീസ് ചെയ്തേക്കുമെന്നാണ് റിപ്പോര്‍ട്ട്. മോഹന്‍ ലാലിന്റെ എക്കാലത്തെയും ഹിറ്റായ നരസിംഹവും ഇതേ ഡേറ്റില്‍ തന്നെയായിരുന്നു റിലീസ് ചെയ്തത്.
ആദിയില്‍ ഡ്യൂപ്പിനെ ഉപയോഗിക്കാതെയാണ് സംഘട്ടനരംഗങ്ങളില്‍ പ്രണവ് എത്തിയെതെന്നും എന്നാല്‍ ഇതൊരു സാധാരണ ഹിന്ദി, തമിഴ് ആക്ഷന്‍ സിനിമയല്ലെന്നും ജീത്തു ജോസഫ് മുമ്പ് വ്യക്തമാക്കിയിരുന്നു. മറ്റേതിലേയും എന്ന പോലെ കുറച്ച് ആക്ഷന്‍ സീനുകള്‍ മാത്രമുള്ള ഒരു റിയലിസ്‌റിക് ചിത്രമാണ് ആദിയെന്നും അദ്ദേഹം പറഞ്ഞിരുന്നു.
Also Read ഇവളാണ് പുലിക്കുട്ടി; ആക്ഷന്‍ ചേരില്ലെന്ന് പരിഹസിച്ചവര്‍ക്ക് ചുട്ടമറുപടിയുമായി കത്രീന; വീഡിയോ കാണാം
ജിത്തു ജോസഫ് സംവിധാനം ചെയ്യുന്ന ആദി ഒരു ഇമോഷണല്‍ ത്രില്ലറാണ്. ആദിക്ക് വേണ്ടി അക്രോബാറ്റിക് സ്വഭാവമുള്ള പാര്‍ക്കൗര്‍ എന്ന ശാരീരികാഭ്യാസത്തില്‍ ചിത്രീകരണത്തിന് മുന്‍പേ പ്രണവ് പരിശീലനം നേടിയത് വാര്‍ത്തയായിരുന്നു. മുമ്പ് ജിത്തു ജോസഫിന്റെ തന്നെ ലൈഫ് ഓഫ് ജോസൂട്ടി, പാപനാസം, എന്നീ ചിത്രങ്ങളില്‍ പ്രണവ് മോഹന്‍ലാല്‍ സംവിധാന സഹായിയായിരുന്നു.
2002 ല്‍ മികച്ച ബാല താരത്തിനുള്ള സംസ്ഥാന സര്‍ക്കാറിന്റെ അവാര്‍ഡ് വാങ്ങിയ താരമാണ് പ്രണവ്. മേജര്‍ രവി സംവിധാനം ചെയ്ത “പുനര്‍ജനി” എന്ന ചിത്രത്തിലുടെയായിരുന്നു താരം ഈ നേട്ടം സ്വന്തമാക്കിയിരുന്നത്. “ഒന്നാമന്‍”, “സാഗര്‍ ഏലിയാസ് ജാക്കി റിലോഡഡ്” എന്നീ മോഹന്‍ലാല്‍ ചിത്രങ്ങളില്‍ പ്രണവ് അതിഥി വേഷത്തില്‍ എത്തിയിരുന്നു.