അമരാവതി: പ്രയാഗ്‌രാജിൽ നടക്കുന്ന കുംഭ മേളയിൽ പങ്കെടുക്കുന്നതായുള്ള നടൻ പ്രകാശ് രാജിന്റെ ഡീപ് ഫേക്ക് ചിത്രങ്ങൾ പ്രചരിപ്പിച്ചതിന് പിന്നാലെ നടപടിയുമായി നടൻ. വൈറൽ ചിത്രത്തിൽ അദ്ദേഹം ത്രിവേണി സംഗമത്തിൽ മുങ്ങിക്കുളിക്കുന്നതായി കാണിക്കുന്നു. എന്നാൽ ഇത് AI- ജനറേറ്റഡ് ചിത്രമാണെന്ന് നടൻ തന്റെ എക്സ് പോസ്റ്റിൽ വ്യക്തമാക്കി. ഇത്തരം പോസ്റ്റുകൾ പ്രചരിക്കുന്നത് നാണക്കേടാണെന്ന് പറഞ്ഞ അദ്ദേഹം വ്യാജവാർത്തകൾ പ്രചരിപ്പിക്കുന്നതിനെതിരെ അപലപിക്കുകയും ഉത്തരവാദികൾക്കെതിരെ പൊലീസിൽ പരാതി നൽകുകയും ചെയ്തു.
പ്രയാഗ്‌രാജിലെ മഹാ കുംഭ മേളക്കിടെ ത്രിവേണി സംഗമത്തിൽ മുങ്ങി നിവരുന്ന തൻ്റെ വ്യാജ ഫോട്ടോ പ്രചരിപ്പിച്ചവരെ പ്രകാശ് രാജ് രൂക്ഷമായി വിമർശിച്ചു. നടൻ സ്നാനം ചെയ്യുന്നതായി കാണിക്കുന്ന ഒരു ചിത്രം സോഷ്യൽ മീഡിയ പ്ലാറ്റ്‌ഫോമുകളിൽ വ്യാപകമായി പ്രചരിക്കുന്നുണ്ട്. എന്നിരുന്നാലും, ബുധനാഴ്ച (ജനുവരി 29) പ്രകാശ് രാജ് തൻ്റെ ഔദ്യോഗിക എക്സ് അക്കൗണ്ടിലേക്ക് ഫോട്ടോ വ്യാജമാണെന്ന് അറിയിച്ചു.
‘ അവൻ്റെ എല്ലാ പാപങ്ങളും പൊറുക്കപ്പെടുകയും നീക്കം ചെയ്യപ്പെടുകയും ചെയ്യുമെന്ന് പ്രതീക്ഷിക്കുന്നു’ എന്ന അടിക്കുറിപ്പോടെ ഒരു ഫേസ്ബുക്ക് ഉപയോക്താവ് പ്രകാശ് രാജിന്റെ ചിത്രം പങ്കിട്ടിരുന്നു. ഈ ചിത്രത്തിന്റെ സ്ക്രീൻ ഷോട്ട് പങ്കുവെച്ചുകൊണ്ടാണ് പ്രകാശ് രാജ് പ്രതികരിച്ചത്.
‘ഫേക്ക് ന്യൂസ് അലേർട്ട്! ‘ഫെക്കു മഹാരാജിൻ്റെ’ മതഭ്രാന്തന്മാരുടെയും ഭീരു പട്ടാളത്തിൻ്റെയും അവസാന ആശ്രയമാണിത്. വ്യാജ പ്രചാരണം നടത്തുക. അവരുടെ വിശുദ്ധ ചടങ്ങിനിടയിലും വ്യാജ വാർത്തകൾ പ്രചരിപ്പിക്കുക എന്നത് എന്തൊരു നാണക്കേടാണ്. ജോക്കർമാർക്കെതിരെ പരാതി നൽകിയിട്ടുണ്ട്. അനന്തരഫലങ്ങൾ നേരിടുക,’ അദ്ദേഹം എക്‌സിൽ എഴുതി.
‘ദൈവത്തില്‍ വിശ്വാസമില്ലാത്ത പ്രകാശ് രാജ് കുംഭമേളയ്ക്ക് പോയി’ എന്ന കുറിപ്പോടെ ചിത്രം എക്‌സിൽ പ്രചാരിക്കുന്നുണ്ട്. ‘ഒടുവിൽ കുറ്റ സമ്മതം നടത്തി അല്ലെ, പ്രകാശ് രാജ് ആണ് പോലും…ഛായ്’ എന്ന മലയാളം കുറിപ്പോടെ പ്രകാശ് രാജ് കൈകൂപ്പി നദിയില്‍ സ്നാനം ചെയ്യുന്ന ഫോട്ടോ 2025 ജനുവരി 28ന് ഫേസ്ബുക്കില്‍ ജയ് കൃഷ്‌ണ എന്ന യൂസര്‍ പങ്കുവെച്ചിരുന്നു.
Content Highlight: Prakash Raj at Mahakumbh? No, this photo is AI-generated
