കാലിഡോസ്‌കോപ്പ് /പ്രകാശ് മഹാദേവഗ്രാമം
മൊട്ടപ്പാറയില്‍ മീനവെയിലിന്റെ പുളപ്പ്. പാറപ്രദേശത്തെ ചാലിട്ട വഴികളിലൂടെ ഒഴുകുന്ന ആള്‍ക്കൂട്ടം. കാസര്‍ഗോഡ് ജില്ലയിലെ വലിയപൊയിലിലെ കാരത്തോടാണ് കാരക്കുളിയന് ഒരു സ്ഥാനമുള്ളത്. വിശാലമായ ചെങ്കല്‍പാറപ്പുറത്താണ് കാരക്കുളിയന് ദേവസ്ഥാനം. ചെറിയൊരു കോണ്‍ക്രീറ്റമ്പലവും കല്‍മതിലും മുന്നിലായി ഓലപ്പന്തലും. ചുറ്റിലും കാരപ്പടപ്പുകള്‍. ദൂരെയായി പറിങ്കിമാവിന്‍ത്തോട്ടം. കാരപ്പടപ്പുകളില്‍ കാരമുള്ളിന്റെ വലിയ തെഴുപ്പുകള്‍ കണ്ടു, എഴുന്നു നില്‍ക്കുന്ന മുള്ളുകള്‍.[]
ഉന്മട്ടക്കുളിയന്‍, മാരണക്കുളിയന്‍, ഉവ്വാര്‍ക്കുളിയന്‍, അകനാള്‍ക്കുളിയന്‍, മാരിക്കുളിയന്‍, മാമായക്കുളിയന്‍ എന്നിങ്ങനെ ഗുളികന്റെ വ്യത്യസ്ത കോലങ്ങളില്‍ ഏറ്റവും അപൂര്‍വ്വമായ ഒന്നാണ് കാരക്കുളിയന്.
ആള്‍ക്കൂട്ടത്തില്‍ നിന്ന് ദൂരേക്ക് മാറി പറിങ്കിമാവിന്‍ തണലില്‍ നിന്നു. പരിചിതമായ മുഖങ്ങളൊന്നുമില്ല. പാറപ്രദേശത്തെ വെയിലറിഞ്ഞ് വളര്‍ന്ന നാട്ടുകാര്‍ക്ക് മീന വെയിലിന്റെ കാഠിന്യം ബാധിക്കുന്നില്ല. ചെണ്ട കൊട്ടാന്‍ തുടങ്ങാന്‍ തുടങ്ങിയപ്പോള്‍ ദേവസ്ഥാനത്തിനടുത്തേക്ക് നടന്നു. അകത്ത് ഫോട്ടോഗ്രാഫ് നിരോധിച്ചുകൊണ്ടുള്ള അറിയിപ്പ് കണ്ടത് കൊണ്ട് പുറത്ത് നിന്ന് ചിത്രങ്ങളെടുത്തു.
സഹായികളുടെ കരുത്തില്‍ നിന്നും ഓടി മൂര്‍ച്ചയും മുതിര്‍ച്ചയുമുള്ള മുള്ളുകളില്‍ പിന്നെയും പിന്നെയും ആഞ്ഞ് പതിക്കുന്ന തിരിയോലയുടെ ഉടല്‍ എന്റെ ക്യാമറയ്ക്ക് വിരുന്നായി. ദൈവത്തിലേക്കുള്ള യാത്ര കഠിനമാണ് എന്ന് വിളിച്ച് പറയുന്നു കാരക്കുളിയന്റെ ശരീരത്തില്‍ തറച്ച് കയറിയ മുള്ളുകളും ചോരപ്പാടുകളും. കാഴ്ചക്കാരായ ആള്‍ക്കൂട്ടം അന്നദാനം കഴിക്കാനുള്ള ക്യൂവായി മാറിയിരുന്നു.
ഉച്ചവെയിലിന്റെ തീച്ചൂട് മാഞ്ഞിട്ടില്ല. വെയിലിന്റെ ഓളങ്ങള്‍ക്കിടയിലൂടെ ദൂരെ കാരക്കുളിയന് ദേവസ്ഥാനത്തിന്റെ മങ്ങിയ കാഴ്ച. മൂര്‍ച്ചയും മുതിര്‍ച്ചയുമുള്ള കാരമുള്ളുകള്‍ തുളഞ്ഞ് കയറിയ കടച്ചിലെടുക്കുന്ന ദുര്‍ബല ശരീരവും നിസ്സഹായമായ കണ്ണുകളും മനസ്സ് വിടുന്നില്ല.
Phone: +91 9895 238 108
പ്രകാശ് മഹാദേവഗ്രാമത്തിന്റെ മറ്റു കാലിഡോസ്‌കോപ്പികള്‍:
ഒറ്റസ്‌നാപ്പിലൊതുങ്ങുന്നതല്ല ഈ ജീവിതം
തെയ്യമായാലും മനുഷ്യനായാലും പുലയന്‍ പാര്‍ശ്വവല്‍ക്കരിക്കപ്പെട്ടവനാണ്