കീവ് സന്ദര്‍ശിക്കില്ല; റഷ്യന്‍ ഓര്‍ത്തഡോക്‌സ് പുരോഹിതനുമായി നടത്താനിരുന്ന കൂടിക്കാഴ്ച റദ്ദാക്കി മാര്‍പ്പാപ്പ
ഡൂള്‍ന്യൂസ് ഡെസ്‌ക്
Saturday, 23rd April 2022, 8:40 am
വത്തിക്കാന്‍: റഷ്യന്‍ ഓര്‍ത്തഡോക്‌സ് പുരോഹിതനുമായി ഫ്രാന്‍സിസ് മാര്‍പ്പാപ്പ നടത്താനിരുന്ന കൂടിക്കാഴ്ച റദ്ദാക്കിയതായി വത്തിക്കാന്‍ വൃത്തങ്ങള്‍.
പാത്രിയാര്‍ക്കീസ് കിറിലുമായി ജൂണില്‍ നടത്താനിരുന്ന കൂടിക്കാഴ്ചയാണ് മാര്‍പ്പാപ്പ വേണ്ടെന്ന് വെച്ചത്. യുദ്ധ സാഹചര്യത്തില്‍ ഉക്രൈന്‍ തലസ്ഥാനമായ കീവില്‍ മാര്‍പ്പാപ്പ സന്ദര്‍ശനം നടത്തില്ലെന്നും വത്തിക്കാന്‍ പറഞ്ഞു.
റഷ്യന്‍ പ്രസിഡന്റ് വ്‌ളാഡിമിര്‍ പുടിനുമായി അടുത്ത ബന്ധമുള്ളയാള്‍ കൂടിയാണ് പാത്രിയാര്‍ക്കീസ് കിറില്‍.
ഫ്രാന്‍സിസ് മാര്‍പ്പാപ്പ ജൂണ്‍ മാസത്തില്‍ ലെബനന്‍ സന്ദര്‍ശിക്കാനിരിക്കുകയാണ്. ഈ സന്ദര്‍ശനത്തിനിടെ ജെറുസലേമില്‍ വെച്ച് പാത്രിയാര്‍ക്കീസ് കിറിലുമായി കൂടിക്കാഴ്ച നടത്താനായിരുന്നു പദ്ധതി.
