പൊന്നിയില്‍ സെല്‍വന്‍ രണ്ടാം ഭാഗത്തിന്റെ റിലീസ് ഡേറ്റ് പ്രഖ്യാപിച്ചു. 2023 ഏപ്രില്‍ 28ന് ചിത്രം റിലീസ് ചെയ്യും. ചിത്രത്തിന്റെ നിര്‍മാണ കമ്പനിയായ ലൈക്ക പ്രൊഡക്ഷന്‍സാണ് ഇക്കാര്യം ട്വിറ്ററിലൂടെ അറിയിച്ചത്.
പൊന്നിയിന്‍ സെല്‍വന്‍ രണ്ടാം ഭാഗം സംബന്ധിച്ച നിര്‍ണായക പ്രഖ്യാപനം ഇന്നുണ്ടാകുമെന്ന് ബുധനാഴ്ച രാവിലെ ലൈക്ക പ്രൊഡക്ഷന്‍സ് അറിയിച്ചിരുന്നു. ‘കവാടങ്ങള്‍ തുറക്കൂ, ഞങ്ങള്‍ പൊന്നിയിന്‍ സെല്‍വന്‍ ടുവിലേക്ക് മാര്‍ച്ച് ചെയ്യുകയാണ്. ഇന്ന് നാല് മണിക്ക് ആവേശകരമായ പ്രഖ്യാപനം,’ എന്നാണ് ലൈക്ക പ്രൊഡക്ഷന്‍സ് ട്വീറ്റ് ചെയ്തത്. ചിത്രം 2023 ഏപ്രിലില്‍ തിയറ്ററുകളില്‍ എത്തുകയെന്ന് ചിത്രത്തിന്റെ വിതരണക്കാരായ റെഡ് ജയന്റ് മൂവീസ് ഉടമ ഉദയനിധി സ്റ്റാലിന്‍ നേരത്തെ പറഞ്ഞിരുന്നു.
ഇന്ത്യന്‍ സിനിമയില്‍ ഈ വര്‍ഷത്തെ വമ്പന്‍ വിജയങ്ങളില്‍ ഒന്നാണ് പൊന്നിയിന്‍ സെല്‍വന്‍. മണിരത്‌നം മാജിക്കില്‍ തെന്നിന്ത്യയിലേയും ബോളിവുഡിലേയും താരനിര എത്തിയപ്പോള്‍ ഇന്ത്യ മുഴുവനുമാണ് അത് കൊണ്ടാടിയത്.
കല്‍ക്കി കൃഷ്ണമൂര്‍ത്തിയുടെ ഇതേ പേരിലുള്ള നോവലിനെ ആസ്പദമാക്കിയാണ് മണിരത്‌നം പൊന്നിയിന്‍ സെല്‍വന്‍ ഒരുക്കിയത്. ആദ്യ ഭാഗം സെപ്റ്റംബര്‍ 30നാണ് തിയേറ്ററുകളില്‍ എത്തിയത്.
വിക്രം, കാര്‍ത്തി, തൃഷ, ഐശ്വര്യ റായ്, ഐശ്വര്യ ലക്ഷ്മി, ജയം രവി, റഹ്‌മാന്‍, പ്രഭു, ശരത് കുമാര്‍, ജയറാം, പ്രകാശ് രാജ്, ലാല്‍, വിക്രം പ്രഭു, പാര്‍ത്ഥിപന്‍, ബാബു ആന്റണി, അശ്വിന്‍ കാകുമാനു, റിയാസ് ഖാന്‍, ശോഭിതാ ധൂലിപാല, ജയചിത്ര തുടങ്ങി ഒട്ടേറേ അഭിനേതാക്കള്‍ ചിത്രത്തിലെത്തിയിരുന്നു. ചിത്രം ആദ്യത്തെ രണ്ട് വാരം കൊണ്ടുതന്നെ ആഗോള ബോക്‌സ് ഓഫീസില്‍ നിന്ന് 400 കോടി ക്ലബ്ബില്‍ ഇടംപിടിച്ചിരുന്നു.
Content Highlight: ponniyin selvan 2 release date