മുംബൈ: സംബിത് പത്ര, സുനില്‍ ദിയോദര്‍ വന്നിവരടങ്ങുന്ന ബി.ജെ.പി നേതാക്കള്‍ക്കെതിരെ പരാതിയുമായി മഹാരാഷ്ട്ര സി.പി.ഐ.എം. പാല്‍ഘര്‍ ആള്‍ക്കൂട്ട ആക്രമണത്തില്‍ സി.പി.ഐ.എമ്മിന് പങ്കുണ്ടെന്ന ആരോപണത്തിലാണ് പാര്‍ട്ടിയെ അപകീര്‍ത്തിപ്പെടുത്തിയതില്‍ പരാതി നല്‍കിയിരിക്കുന്നത്.
കഴിഞ്ഞ ദിവസമാണ് പാല്‍ഘറില്‍ ആള്‍ക്കൂട്ടം സന്യാസിമാരടങ്ങുന്ന മൂന്നുപേരെ ആക്രമിച്ച് കൊലപ്പെടുത്തിയത്. സംഭവത്തില്‍ പൊലീസ് അറസ്റ്റ് ചെയ്തവരില്‍ അഞ്ച് പേര്‍ സി.പി.ഐ.എം പ്രവര്‍ത്തകരാണെന്നാണ് ബി.ജെ.പി ആരോപിക്കുന്നത്. സംഭവത്തില്‍ പ്രാദേശിക സി.പി.ഐ.എമ്മിന് പങ്കുണ്ടെന്നും ബി.ജെ.പി ആരോപണം ഉന്നയിക്കുന്നുണ്ട്.
എന്നാല്‍, പാല്‍ഘര്‍ ആള്‍ക്കൂട്ട ആക്രമണത്തിലെ ഭൂരിഭാഗം പ്രതികളും ബി.ജെ.പി അംഗങ്ങളാണെന്ന് മഹാരാഷ്ട്ര കോണ്‍ഗ്രസ് നേതൃത്വം പറഞ്ഞു. സംഭവത്തില്‍ രാഷ്ട്രീയ നേട്ടത്തിന് വേണ്ടി ബി.ജെ.പി വര്‍ഗീയ രാഷ്ട്രീയം കളിക്കുകയാണെന്നും കോണ്‍ഗ്രസ് സംസ്ഥാന ജനറല്‍ സെക്രട്ടറി സച്ചിന്‍ സാവന്ത് ആരോപിച്ചു.
