[]ഗുരുവായൂര്‍: വിപണിയില്‍ അരക്കോടിയോളം രൂപ വില വരുന്ന 500 ജോഡി പുലിനഖം ഗുരുവായൂരില്‍ നിന്ന് വനംവകുപ്പധികൃതര്‍ പിടി കൂടി. ഇവ കടത്താന്‍ ശ്രമിച്ച മൂന്നംഗ സംഘത്തെയും പിടികൂടിയിട്ടുണ്ട്.
ഹമീദ്, വിഷ്ണു, അജിതന്‍ എന്നിവരെയാണ് പിടികൂടിയത്. ഇവരില്‍ രണ്ട് പേര്‍ തൃശൂര്‍ സ്വദേശികളും ഒരാള്‍ കൊല്ലം സ്വദേശിയുമാണ്. തിങ്കളാഴ്ച വൈകീട്ട് അഞ്ച് മണിയോട് കൂടിയാണ് ഗുരുവായൂരില്‍ പുലിനഖം വില്‍ക്കാന്‍ ശ്രമിക്കുന്നതിനിടെ സംഘം പിടിയിലായത്.
വനം വകുപ്പിന്റെ ഇന്റലിജന്‍സ് വിഭാഗത്തിന് കിട്ടിയ രഹസ്യ വിവരത്തിന്റെ അടിസ്ഥാനത്തില്‍ നടത്തിയ തിരച്ചിലിനൊടുവിലാണ് സംഘത്തെ പിടികൂടിയത്.
ആയിരത്തോളം നഖങ്ങളാണ് മൂവരുടെയും കയ്യില്‍ നിന്നായി പിടികൂടിയത്. ഇവര്‍ക്കു പിന്നില്‍ വന്‍ റാക്കറ്റ് ഉണ്ടെന്നാണ് പോലീസ് നല്‍കുന്ന പ്രാഥമിക വിവരം.